Төрийн албан хаагчдын түрээслээд өмчлөх байранд өндөр эрсдэлтэй нөхцөлд ажиллаж буй эмч, эмнэлгийн ажилтнуудын төлөөлөлд Улсын Шадар сайд, Улсын Онцгой комиссын дарга Ө.Энхтүвшин батламж гардууллаа.

Өнгөрсөн сарын 20-нд УОК-оос “Төрийн үйлчилгээний болон төрийн тусгай албан хаагчдыг түрээслээд өмчлөх хэлбэрээр орон сууцаар хангах тухай” тогтоол гаргасан билээ.

Улсын Шадар сайд, Улсын Онцгой комиссын дарга Ө.Энхтүвшин: "Монгол улс дотооддоо коронавирусийн халдвар алдахгүй байхад онцгой үүрэг гүйцэтгэж, эрсдэл өндөр нөхцөлд ажиллаж буй эрүүл мэндийн салбар, онцгой байдал, цагдаа, гааль зэрэг байгууллагад ажилладаг төрийн албан хаагчдын өдөр шөнөгүй зүтгэж буйн үр дүн. Тиймээс эдгээр иргэнээ урамшуулах нь төрийн үүрэг.Та бүхэндээ баярлалаа, улам хичээж ажиллаарай " гэсэн юм.

Түрээслээд өмчлөх байранд эхний ээлжинд эрсдэл өндөртэй нөхцөлд ажиллаж байгаа 1300-1500 төрийн албан хаагчийг хамруулах аж. Нийслэлийн орон сууцны корпорацийн хүлээн авсан байруудаас иргэд өөрсдөө сонголтоо хийж, түрээслээд өмчлөх боложтой аж.

Урьдчилгаа төлбөрийн хувьд одоо хэрэгжиж байгаа ипотекийн зээлийг бодвол уян хатан нөхцөлтэй, сар бүр өрхийн орлогоосоо боломжит дүнгээр төлөх боломжтой юм байна.