Йогийн багш, бясалгагч И.Энхтуул

Идэж, ууж, унтаж, сэрэхийг хэн ч л чадна шүү дээ. Тиймээс хүн байхын утга учрыг өөрөөсөө олж авсандаа баярладаг. 

Таван жилийн өмнө би мөрөөдөл, зорилгодоо хүрнэ гэсэн итгэлгүй, эрүүл мэнд, сэтгэл зүйн асуудалтай, манан дунд төөрчихсөн нэгэн байв. Харин йог, бясалгал хийдэг болсноос хойш амьдралд минь маш олон эерэг өөрчлөлт гарсан. Одоо хийж буй ажил маань бүх зүйлсийг их гоё тунгалаг харагдуулдаг.

Бясалгал хийхийн утга утга учир нь өөрийнхөө гүн рүү нэвтэрч гадаад ертөнцөөс хайж буй  зүйлсийг олоход оршино. Яг л далайн гүнээс сувд олохтай адил. 

Бид гадаад етөнцийн дуу чимээ, хүрээлэн буй орчноос үүдэх стресс, бухимдлаас болж түүнийгээ ер анзаардаггүй.

Йогийн хичээлд эрүүл мэндийн эсвэл сэтгэл зүйн  янз бүрийн асуудалтай хүмүүс ирдэг. Йог, бясалгал хийн сэтгэл санаагаа тайвшруулаад гэртээ очоод тийм л эерэг уур амьсгал бүрдүүлнэ. Тухайн хүн албан байгууллагад ч мөн адил уур бухимдалгүй, аз жаргалтай харилцааг түгээнэ. 

Учир нь бид үгээр биш, өөрөөсөө ялгаруулж буй үелзэл долгионоор харилцдаг. Тэгэхээр хүн юу бодож байна, хэр их стресст автаж байна гэдгээс шалтгаалан тухайн хүнд ирэх үр нөлөө тийм л байна.

Иймд бие, сэтгэлээ зэрэг амраахын тулд байгальд ойр байж, дасгал хөдөлгөөн хийх нь хамгийн сайн амралт болдог.