“Call pro” компанийн хамтран байгуулагч, “Faro” сургалтын төвийн партнер, комедиан Б.Идэр-Од өөрийн хэл сурсан арга барилаасаа ингэж хуваалцлаа.  

"Би Англи хэлийг маш сайн эзэмшсэн. Мөн энгийн харилцан ярианы хэмжээнд Герман, Орос хэлтэй. Сүүлийн үед Солонгос, Япон хэлийг ярианы түвшинд сурмаар байгаа. Хэл сурах гэж байгаа хүн хамгийн түрүүнд үг цээжлэх техниктэй байх ёстой. 

Зарим хүн бичиг цаасны аргаар буюу бичгийн орчуулга хийж сайн сурдаг бол бусад хүнд ярьж, сонсох нь үр дүнгээ өгдөг. Тиймээс өөрийнхөө арга барилыг тодорхойлоод, ярьж сурдаг төрлийн хүн бол гадагшаа явж, жуулчны хөтөч хийж, өөрийгөө тухайн орчинд нь оруулах хэрэгтэй. 

Харин орчуулга хийх нь үр дүнтэй байдаг бол мэргэжлийнхээ дагуу болон сонирхлоороо амьдралд наалдацтай бичиг цаастай зууралдаарай. Томчуудын хувьд Монголд дүрмийн сургалтаа сайн авчихаад гадаад руу явбал илүү үр дүнтэй байдаг шүү. Хүүхдүүд бол шууд явж болж байна. Би бол бичгийн төрлийн хүн. Орчуулга хийхээр их зүйлс сурдаг" гэв.

Тэрээр "Англи хэлтэй болчихвол, хүний хувийн орлого хамгийн багадаа 25 хувь хүртэл шууд болон шууд бусаар нэмэгддэг. Өөртөө одооноос хөдөлмөрөөрөө хөрөнгө оруул" гэсэн юм.