Өглөө ихэвчлэн 07.00-08.00 цагийн хооронд босдог. Эрт төлөвлөсөн ажлууд байвал мэдээж эрт босно. Хүүхдүүдтэйгээ хамт өглөөний цайгаа уучхаад сургууль, цэцэрлэгт нь хүргэж өгнө. Тэгээд ажил руугаа явдаг даа. 

Би өглөө бүр талархаж сэрдэг. Энэ өдрийг надад өгсөнд баярлалаа гэж бурхандаа талархдаг. Өглөө босоод урд өдөр нь төлөвлөсөн ажлуудаа эргэж хардаг юм байна.

Жил бүрийн аравдугаар сарын 20-нд Монголын маркетеруудын өдөр тохиодог. Манай холбооноос энэ жилийн Маркетеруудын өдрийг угтаж хэд хэдэн төлөвлөгөөт ажлууд зохион байгуулж байна. Тухайлбал,  маркетеруудын дунд фэйсбүүкээр “Манай маркетерууд” селфи давалгаа уралдааныг  зарласан. Миний хувьд уралдаан зохион байгуулах багийн ахлагч. Мөн бид “10-20 монгол брэндүүд бүтсэн түүх” гэх Монголын бизнесийн байгууллагуудын брэнд бүтээгдэхүүнийг хэрхэн, яаж бүтээсэн талаарх ном сурах бичгийг гаргахаар ажиллаж байна.  

Би их гэр амьтай хүн. Хүүхдээсээ хамаг эрч хүчийг авдаг. Өглөө хэрэв хүүхдүүдээсээ түрүүлж гарахаар бол заавал үнсэж гардаг. Яг энэ үед хүүхдүүдээсээ авсан эрч хүчээрээ төлөвлөсөн ажлуудаа хурдан амжуулчхаад гэртээ хурдан ирж, тэдэнтэйгээ хамт байх юмсан гэсэн бодлоор өдрөө эхлүүлдэг.  

Амьдралд маш олон төрлийн асуудал, зовлон бэрхшээл бий. Бүх зүйл түр зуурынх. Тиймээс залуучуудыгаа аливаа асуудал, зовлон бэрхшээл, баяр хөөр аль аль нь тохиолдсон ч шантралгүйгээр зоригтойгоор давж, зорилгоо эргэн санаж, өдөр бүр хүсэл тэмүүлэлтэйгээр хөдөлмөрлөөсэй гэж хүсэх байна даа.