Заримдаа эрт 06.00 цагт босдог. Хааяа аажуу тайван орноосоо өндийнө. Гол амжуулах ажил гэвэл мэдээ үзнэ, өдрийн ажлын хуваариа гаргана, уулзалтуудынхаа цаг, байршлыг тогтооно. Энэ мэтчилэнгээр өглөөний бэлтгэлээ хийдэг. 

Өнөөдөр хийх ёстой гол ажлууд юу билээ, тэдгээрийг яаж амжуулах вэ, дараагийн ажилдаа хэрхэн бэлдэх вэ, өнөөдөр ямар зүйлийг эхний ээлжид зайлшгүй хийх ёстой гэдгээ ач холбогдлоор нь эрэмбэлнэ.   

Миний хувьд дөрвөн төрлийн ажил байна. Нэгт, их сургуульд багшилдаг учраас сургалт судалгааны ажил, хоёрт, олон нийтийн ажил, гуравт, бизнесийн ажил, дөрөвт, миний бүтээлийн ажилтай холбоотой ажил. Бүгдийг нь цаг хугацаагаар нь эрэмбэлж, амжуулах талаас нь цагаа зарцуулна. Чөлөөт цаг гарвал байнга нөүтбүүктэй явдаг учраас гурав, дөрөв дэх ажлынхаа баримтуудыг боловсруулна. Мэйлээ шалгаж хариу илгээнэ. Тэгээд дараагийн ажлуудаа төлөвлөнө дөө.  

Оны эцэст манай орны эдийн засгийн байдал хэр сайн байх вэ, мөнгөний бодлого, төсвийн бодлого, макро эдийн засгийн өсөлт ямар байх вэ зэрэгт судлаачийн зүгээс бодлогын талаас нь нэлээн анхаарлаа хандуулж байгаа. Дата мэдээлэл унших, сүүлийн үеийн мэдээ мэдээлэлтэй танилцах шаардлагатай байдаг тул өнөөдөр эдийн засгийн хувьд ямар өөрчлөлт, ямар шинэ хандлага, технологийн хувьд ямар хувьсал гарч байна гэдгийг байнга соргогоор харж, мэдэхгүй нэр томьёо, ойлголт гарч ирвэл сурч мэдэхэд цагаа зарцуулж байна.    

Өдөрт 24 цаг бий. Амжуулах ажил маш их. Тиймээс бүгдийг нь амжуулахын тулд сайн зохион байгуулах хэрэгтэй гэж боддог. Миний хувьд сайн төлөвлөдөг. Ингэж байж л өдрийн том алхмыг амжилттайгаар давж гарна.  

Цагийг алт гэвэл залуучууд баян гэсэн үг. Тиймээс цагаа үрэн таран хийхгүйн тулд оюундаа хөрөнгө оруулаарай.