Өглөө 07.10 цагт босдог. Өглөөний цайгаа уунгаа бага хүүгээ цэцэрлэгт нь  явуулахын тулд сэрээдэг.        

Өнөөдөр бас нэгэн гоё өдөр ирлээ дээ гэж боддог. Өглөө сэрсэндээ баярладаг. Зарим хүн орой нь унтаад өглөө нь сэрэхгүй байх тохиолдол их. Сүүлийн үед бүүр элбэг болж. Цонхоороо өглөөний нар, модны навчсыг харж байгаадаа их баярладаг. 

Фэйсбүүкээрээ хэтэрхий олон мэдээлэл шэйрлээд блоклуулсан тул компанийнхаа сошиал идэвхжүүлэлтийн ажлаа хийж чадахгүй байсан. Өнөөдөр миний хорио тавигдана. Тиймээс идэвхжүүлэлтээ хийхээр төлөвлөж байна.  

Манай компаниар сонин сайхан ихтэй. Удахгүй Баянхонгор аймагт Хөгжлийн бэрхшээлтэй иргэдийн төв байгуулагдах гэж байгаа. Бид зарим шийдлийг гарган өгч байгаа. Сая Өмнөговь аймгийн зургаан сургууль, долоон Багийн хөгжлийн төв дээр үнэлгээ хийсэн. Тайлангуудаа дуусгаад тус аймгийн Даланзадгад сумын Засаг даргын Тамгын газарт хүлээлгэн өгөх гэж байна. Хөгжлийн бэрхшээлтэй хүүхдүүдийн сургуульд явах боломж нь бүрдсэн байна уу, өндөр настай иргэд Багийн хөгжлийн төвөөр үйлчлүүлэх боломжтой байна уу хэрэв боломжгүй бол юуг нь засаж өөрчлөх вэ гэсэн тайланг гаргаснаа гардуулан өгнө.  

Түүнчлэн гаргүй хүн компьютер удирдах удирдамжийг шинээр оруулж ирсэн. Одоогоор хүмүүст танилцуулах ажил үлдсэн. 

Хийсэн ажил маань бүтэж байвал урамшина. Бүтэхгүй бол бүтэлгүйтлээ арилгахыг хичээнэ. Өглөө эсэн мэнд сэрж байна гэдэг чинь хамгийн том тарни. 

Залуу хүний нэг онцлог нь зоригтой байх явдал юм. Зоригтой байх гэдэг нь тодорхой хэмжээгээр тэнэг байх боломжийг олгодог юм болов уу гэж боддог. Тиймээс санасан бүтсэн зүйлээ зоригтойгоор эхлүүл. Тэгтээ тэргүй нас ахих тусам эрч хүч чинь буурна. Залуучууд аа, зоригтой бас тэнэг байгаарай!