Өглөө 06.00-06.30 цагт босоод хүүтэйгээ хамт өглөөний цайгаа заавал уудаг. Ажил руугаа явах замдаа хүүгээ сургуульд нь хүргэж өгөөд амжилт хүсээд үнсдэг. Хүү маань ч өдөр бүр “Ээж ээ,  амжилт” гэсэн урмын үгийг надад хайрладаг. 

Сайхан өдөр болж байна. Ажил маань бүтэмжтэй байгаасай гэх зэргээр аль болох гэгээлэг зүйл боддог. Зарим өглөө ажлаа зүүдэлж сэрнэ гээч. Өдрийг үр бүтээлтэй өнгөрүүлэх нь чухал учраас төлөвлөсөн ажлуудаа хамгийн түрүүнд боддог доо.  

Жил бүрийн арваннэгдүгээр сарын 17-нд Дэлхийн оюутны эрхийг хамгаалах өдөр тохиодог. Энэхүү өдрийг угтан манай сургуулиас жил бүр Шилдэг тэргүүний оюутан, Шилдэг хамт олныг шалгаруулдаг уламжлалтай. Энэ жилийн хувьд арга хэмжээг манай Хүмүүнлэгийн ухааны сургууль зохион байгуулж байна. Энэ ажлын эхлэл болгож салбар сургуулийнхаа амжилттай суралцаж буй тэргүүний оюутнуудынхаа түүхтэй танилцаад, шалгаруулалтаа хийнэ. Дараа нь нэг, хоёрдугаар курсийн оюутнуудаа эрүүл мэндийн урьдчилан сэргийлэх үзлэгт хамруулах ажлаа ахиулна даа.

Өдөр болгон очиж чадахгүй ч ээж аавтайгаа утсаар ярихаар сэтгэл сэргээд л ирнэ. Дөч хол давсан насандаа гүйж очоод эрхэлж налаад суух ээж аавтай байна гэдэг их аз завшаан, том буян гэж ойлгодог. Хоёр бууралтайгаа уулзаж, хөөрөлдөж суухаараа хязгааргүй их аз жаргалыг мэдэрдэг.

Өөрийнхөөрөө байх нь чухал. Өөдрөг, эрч хүчтэй, хүн ёсыг эрхэмлэдэг,  зоригтой, өөртөө итгэлтэй байх нь залуу хүний чимэг гэж боддог. Эргээд бодоход залуудаа байнга шинэ зүйлийг санаачилж, эрэлхийлдэг байлаа. Одоо ч гэсэн тэр зангаа тавиагүй л явна. Тиймээс залуучуудаа эрч хүчтэй бас ямагт шинийг санаачлагч байхыг хүсье.