Ажлын ачааллаас шалтгаалаад өглөө босох цаг өөр өөр байдаг. Ажил оройтож дууссан бол сайн унтаж амрахыг бодно. Энгийн үед заавал долоон цаг унтахыг хичээдэг. Өглөө босоод хүүхдүүддээ өглөөний цайг нь бэлдэж өгнө. Өглөөг тайван эхлэхээр өдөржингөө бодол цэгцтэй, амгалан байдаг юм шиг санагддаг. 

Өдөр өдрөөсөө хамаарч янз бүрийн бодолтой сэрдэг. Өглөө мандах нарыг харна гэдэг хамгийн сайхан зүйл юм гэнэ лээ.

Хэсэг хугацаанд киноны нээлтийн ажлаар гэр бүлээсээ хол байсан болохоор хайртай хүмүүстэйгээ цагийг үр бүтээлтэй, хөгжилтэй өнгөрөөхийг хүсч байна. Ээж хүний хувьд гэртээ байгаагүй цаг хугацаагаа нөхөх хэрэгтэй.

“Бүх юм сайхан болно” гэж хэлэх дуртай. Сөрөг муу зүйл ярихаас аль болох зайлсхийдэг. Хэлсэн үг маань биелээд байгаа юм шиг санагддаг. Хүний бодол санаа хамгийн хүчтэй. Сөрөг бодлууд таныг хүссэндээ хүрэхэд саад болдог бол эерэг бодлууд зорилгодоо хүрэхэд нөлөөлнө.

Ямар ч хүн тууштай, аливаад чин сэтгэлээсээ хандаж, өөртөө үнэнч байвал бүх зүйл бүтдэг. Боломж үргэлж таны хажууд байдаг.