Өглөө 06:40 цагт босдог. Өглөөний цайг алгасахгүй байхыг хичээдэг. Олон хүний өглөө надаас шалтгаалдаг болохоор тэдэндээ кофег нь өгөхийн тулд 30-40 минутын өмнө очиж, бэлтгэлээ хийдэг. 

Бүх өдөр өчигдөр шиг байхгүй, өчигдрөөс илүү өнөөдрийг бүтээхийн төлөө гэдэг бодлоор өглөөг эхлүүлдэг. 

Сүүлийн үед шар тостой кофег хүмүүс их сонирхон уух болсон. Шар тостой кофенд бүтээгдэхүүн хөгжүүлэлт хийгээд орц найрлагыг нь баяжуулаад сонирхолтой шинэ цэс гаргасан. Сүүлийн нэг сарын турш энэ кофегоо уусан. Амтанд нь бүр дурлаад байгаа. Энэ кофеныхоо ашиг тусын талаар мэргэжлийн хүмүүсээс зөвлөгөө авч байгаа. Баталгаатай, бүтээгдэхүүн болсных нь дараа хэрэглэгчдэд санал болгон гээд туршилт хийж байгаа. Энэ бүтээгдэхүүнээ “нийслэл кофе” гээд нэрлэчихсэн. Шинэ оны дараа кофенд дурлагсаддаа амтлуулах зорилготой ажиллаж байна. 

Боломжгүй зүйл гэж байхгүй. Болохгүй бол болгоно гэж хэлэх дуртай. Аяга кофены дараа амьдрал эхэлдэг гэдэг үгийг хамгийн их хэлдэг. Хичнээн яарч байсан ч кофегоо тухтай сууж байгаад уух хэрэгтэй. Өөртөө бага ч гэсэн “таашаалтай” цагийг зарцуулж чадвал эрч хүчтэйгээр өдрийг өнгөрөөнө.

Мөнгөний төлөө биш өөрийнхөө төлөө ажилдаа сэтгэл гарга. Чиний хийж байгаа зүйлийг чамаас өөр хэн ч хийж чадахгүй юм шиг мундаг нь бай. Эцэст нь амжилт гэх “шагнал” ирэх болно гэж зөвлөмөөр байна.