Тархиа амраахын тулд нойроо сайн авахыг хичээдэг. Бага насны хоёр хүүхэдтэй учраас өглөө 04:00-05:00 цагт босч, төлөвлөсөн ажлуудаа хийдэг. Австралид хүмүүс өдрийн хоолоо ихэвчлэн гэрээсээ авч явдаг учир нөхөр болон хүүхдүүддээ өдрийн хоолыг нь өглөө эрт бэлдэж өгдөг. 

Ямар сайхан өглөө вэ гэж боддог.

Өнгөрсөн он миний хувьд өөрийгөө олон зүйлд сорьсон, хүсэл мөрөөдлөө биелүүлсэн сайхан жил байлаа. Дэлхийн шилдэг их сургуульд жил хүрэхгүй хугацаанд суралцахдаа сурлагын амжилтаараа тэргүүлж, бизнес ментороос эхлээд академик коуч, амбассадор хүртэл дэвшин ажилласан . Мөн бизнесийн сургуулийнхаа гадаад төлөөлөгчөөр энэ онд сонгогдсон нь нэр төрийн хэрэг байлаа . Энэ хариуцлага, итгэлийг алдахгүйг хичээж явна даа. Өнөөдөр Австралийн Мельбурн хотод Дэлхийн залуучуудын 2020 оны чуулга уулзалтад эх орноо төлөөлөн "Сэргээгдэх эрчим хүч"-ний чиглэлээр илтгэл тавьж, НҮБ-ийн семинар, салбар хуралдаануудад оролцоно. Өчигдөр “Дэлхийн тогтвортой хөгжлийн зорилгын хүрээн дэх сэргээгдэх эрчим хүчний бодлогын асуудал”-аар илтгэл хэлэлцүүлсэн. 

Миний аз жаргалын тарни бол хоёр охиноо үнэрлэх. Эх хүн учраас энэ нь надад ямар ч тарниас илүү байдаг. 

Ямар ч ажлын тушаа нь залхуурал. Зорилгоос буцах зам мянга, харин түүнд хөтлөх зам цөөн. Тэгэхээр өөрт буй боломжоо ашиглаж чадахгүй бол 100 хувь алдаж байна гэсэн үг. Боломж бидэнд үргэлж бий. Үүнийг ашиглах, эс ашиглах нь таны сонголт. Учир нь зорилго бол хугацаатай мөрөөдөл юм. Хожим харамсахгүйн тулд залуу насандаа ачаалал авч өөрийгөө сорьж, хөгжүүлээрэй гэж залуустаа зөвлөе.