Өглөө 07:00 цагт босдог. Ихэвчлэн хүүгээ хичээлд нь хүргэж өгчхөөд фитнесст явдаг. Фитнессээр хичээллэснээр хөдөлгөөний дутагдлаас сэргийлж, стресс тайлагдаж, ажилдаа төвлөрөхөд ач холбогдолтой учраас өдөр бүр нэг цагийг зарцуулдаг. Дараа нь төлөвлөсөн ажлуудаа хийж эхэлнэ.

Хайрт хань болон үрсээ хараад гэр бүлийн халуун дулаан уур амьсгал, хайрыг мэдэрч, өглөөг эхлүүлдэг. Элэг бүтэн амьдрал бол бурхнаас өгсөн хамгийн том бэлэг учраас өглөө бүрт талархдаг юм. 

Өнөөдөр 12:00 цагаас “Таван толгой түлш” ХХК-ний төлөөлөн удирдах зөвлөлийн аудитын хорооны хуралд сууна. Хурлын дараа судлаач залуустай хамт Чингэлтэй дүүргийн 16-р хорооны зорилтот бүлгийн айлуудад очиж, яндан, пийшингийн бүрэн, бүтэн байдлыг шалгах төлөвлөгөөтэй байгаа.

Бид 2016 оны 12-р сарын 26-нд “Боож үхлээ” анхны жагсаалаа зохион байгуулж байсан бол энэ жилийн хувьд жагсаал маань үр дүнд хүрсэнд баяртай байна. Хүүхдүүд минь надад утааны эсрэг тэмцэх хүч, сэдэл өгсөн. Хэрэв хүүхэдгүй байсан бол агаарын бохирдлын асуудалд анхаарлаа ингэж их хандуулахгүй байсан байх. Энэ ажлуудын маань үр дүн хүүхдүүдэд эерэгээр нөлөөлж байгаад баяртай байна.

Миний аз жаргалын тарни бол эерэг бодол. Эргэн тойронд байгаа хүмүүстэй эвтэй байж, эерэг харилцааг эрхэмлэдэг. Нийгмийн харилцаанд бидний эерэг хандлагыг үгүйсгэх олон үзэгдлүүд байдаг ч эерэг бодолтой байж, хүн чанараа гээхийг хүсдэггүй.

Хожим харамсахгүйн тулд өөрөөс шалтгаалах зүйлсээ 100 хувь хийж дадаарай. Зорилго тань биелэх боломжгүй болвол зорилгоо бус үйлдлээ өөрчлөөд үзээрэй гэж зөвлөе.