Өглөө 07:00 цагаас бэлтгэлтэй байдаг учраас 06:00 цагт босч, тухайн өдөр амжуулах ёстой зүйлсээ төлөвлөж, бясалгадаг. Энэ нь өдрийг үр бүтээлтэй өнгөрөөхөд тус болдог. 

Өөрийгөө "тухтай бүсээс"-ээ чөлөөлж, бүх хүчээ дайчилна гэж боддог.

Йордан улсад зохиогдсон олимпийн эрх олгох тэмцээнд оролцож ирээд 14 хоногийн тусгаарлалтад орсон. Ирэх долоо хоногт ч бас тусгаарлагдана. Тиймээс тусгаарлалтын өрөөндөө дасгал хийж, олимпийн бэлтгэлээ сайн хангахыг хичээж байна. Өмнөх алдаагаа засаж, өөртэйгөө түлхүү ажиллана гэсэн төлөвлөгөөгөөр бэлтгэлээ хийж байна.

Монголчууд амны билгээс, ашдын билэг гэдэг шүү дээ. Ийм учраас үгийн хүч байдагт итгэдэг. "Би олимпийн аварга болно" гэж өдөр бүр өөртөө хэлж,  үүнээс урам авдаг. “Өөрийгөө ялан дийлэхээс бүхий л ялалт эхэлдэг” гэж хэлэх дуртай. 

Залуу хүнд хамгийн чухал зүйл бол зорилго. Тиймээс зорилгоо тодорхойлж, түүндээ хүрэхийн тулд тууштай хөдөлмөрлөх хэрэгтэй. Шантарч, алдах тохиолдол олон ч даван туулж, дүгнэлт хийж сураарай. Мөн өөрийгөө алхам тутамдаа хөгжүүлэхээ бүү мартаарай хэмээн зөвлөе.