Монголд нийтийн хэрэглээгээрээ фэйсбүүкийн дараа ордог, хамгийн гэрэл гэгээтэй, эерэг сошиал сүлжээ бол яах аргагүй инстаграм билээ. Судалгаагаар энэ сувгийн идэвхтэй хэрэглэгчдийн 59 хувь нь 18-29 насны залуус байдаг аж. 

Зар сурталчилгаа, маркетинг, борлуулалтын салбарынхны хувьд энэ насныхан бол алтны уурхай л гэсэн үг. Нэгэнт эдгээр залууст өөрсдийн брэндээ таниулж, хоногшуулж чадвал тэдний дээд болоод доод үеийнхнийг ч “атгандаа” оруулж чадах тул залууусын анхаарлыг татахаар ухаан бодлоо уралдуулдаг билээ.

Орчин үед сошиал медиа хэрэглэгчид нас, хүйс харгалзахгүй өнгөлөг, визуал контентийг илүүтэй сонирхдог болсон тул инстаграм энэ сонирхлыг яв цав хангаж чаддаг.

Инстаграм нь хэрэглэгчдийнхээ эрэлт хэрэгцээ сонирхлыг үргэлж судалж, бүтээлч хөгжүүлэлтүүд хийсээр байдаг тул тэдгээрийг оновчтой ашиглан дагагчдаа нэмэгдүүлж, улмаар тэднийг харилцагч, худалдан авагч болон хувиргах зэрэг маш гайхалтай боломжийг олгодог.

Ингээд өмнө нь гаргадаг байсан түгээмэл алдаагаа засаж инстаграм хаягаа амжилттай хөгжүүлэхэд тань туслах зөвлөгөөг хүргэж байна.

Чанар муутай, бүтээлч бус зураг нийтлэхээс татгалзах

Өөрийн брэнд, амьдралын хэв маягаа бусдад хуваалцах замаар өөрийн үнэлэмжээ өсгөх цаашлаад орлого олох хүсэлтэй бол та хэзээ ч чанар муутай, бүрсгэр, гэрэл муутай товчоор хэлбэл гоо зүйн шаардлагад нийцэх зураг нийтэлж болохгүй. 

Ингээд зурган контентоо сайжруулж, инстаграмын мангас болоход тань туслах бяцхан зөвлөгөөг хүргэе.

• Истаграмд зураг нийтлэх стандарт хэмжээ бол 1080px*1080 юм. Мөн зургийн нягтаршлын дээд хэмжээ 2048px *2048px. Харин хөндлөн зургийн хэмжээ нь 1080px*566px. Мөн та 600 px*400 px хүртэлх жижиг зураг нийтэлж болно,
• Зургийг боломжит бүтээлч байдлаар дарж, сайн засварлахад ур ухаан зарж сураарай,
• Snapseed, Adobe Lightroom эсвэл Adobe photoshop, VSCO гэхчлэн зураг засварладаг апп-ын тусламжтай зургынхаа гэрэл, сүүдэр, тон, өнгийг тодотгож байх,
• Дугуй, уруу харсан гэхчлэн бүтээлч сонирхолтой байдлаар зургаа нийтлэх,
• Инстаграмын зураг янзлах фильтрүүдийг хамгийн сүүл буюу зургаа нийтлэхийн өмнө ашиглаарай.

Bio буюу намтар хэсгээ оновчтой бичиж чадахгүй байх

Намтар хэсгээ аятайхан бичиж чадахгүй байх нь хаягаар чинь зочлогсдын анхаарлыг үл татах хийгээд дагагчидтайгаа харилцаа үүсгэх боломжийг хаадаг. 150 тэмдэгтэд багтаан өөрийгөө хэн бэ, юу хийдэг вэ эсхүл бүтээгдэхүүн чинь яг юу вэ гэдгийг хүмүүс үүгээр мэдэх боломжтой.

Инстаграмын энэ орон зай нь ирээдүйн дагагчид болоод одоогийн дагагчдад бүтээгдэхүүн үйлчилгээг тань илүү сайн ойлгоход туслах үүрэгтэй. Тиймээс үүнийг бүрэн дүүрэн ашиглаарай.

Ухаалаг bio бичих зөвлөмж:

• Бизнесийн зорилгоор ашигладаг бол тухайн брэнд, бүтээгдэхүүн үйлчилгээнийхээ талаар товч, тодорхой, ойлгомжтой, анхаарал татахуйц тайлбар бичих,
• Мөн компанийнхаа зорилго, зорилт, алсын хараа зэрэг уйтгартай, хэрэглэгчдийг залхаах тайлбар оруулахгүй байх,
• Бизнесийн зорилгоор хөгжүүлж буй бол танайх руу шууд залгах, эсвэл мэйл, чат бичих, танай байршлыг заах зэрэг харилцагч болоход хөтлөх товчлуур нэмж өгөх,
• Бусад цахим хаягынхаа /фэйсбүүк, пинтерест, линкэдин, веб сайт/ холбоосыг тавих,
• Мобайл болон компьютерийн дэлгэцэд хэрхэн харагдахыг харьцуулан үзэж цэгцтэй харагдах тайлбар бичээрэй,
• Харагдах үзэмж буюу текстийн фонт, эможи, хаштаг зэргийг ашиглаж, шинэлэг сонирхолтой, зугаатай байлгах хэрэгтэй.

Хэтэрхий ойр ойрхон эсвэл маш цөөхөн зураг нийтлэх

Хэт ойр ойр эсвэл удаан хугацаанд алга болж байгаад жилдээ цөөн хэдэн зураг, бичлэг нийтлэх нь дагагчдаа алдах үндэс. Усанд хаясан чулуу мэт алга болох нь тэдэнд ямар нэгэн үнэ цэнэ нэгэн  өгөхөө болсон учраас дагагчдаа алдах үндэс болно. Аль эсвэл хэт ойр давтамжтай, ямар ч зорилгогүйгээр, тодорхой мессежгүй зураг нийтлэх нь тэднийг залхаах, спам болохын цондон.

Тухайлбал, сэлфинд донтох буюу өдөр бүр сэлфигээ нийтлэх нь таны дагагчдын сонирхлыг бууруулна. Харин үүний оронд тэдэнд үнэ цэнэ өгөх контент бүтээгээрэй. 2-3 дараалсан сэлфигээ нийтлэх нь дагагчдын engagement-ийг үгүй хийнэ.

Харин үүний оронд амар агуулгатай контентийг хэзээ, хэрхэн нийтлэх, хэдийд хэрхэн нийтэлбэл олон хүнд хүрч болох талаар инстаграмын алгоритмд анализ хийж дадаарай.

Зургандаа түүхий тайлбар бичих, бүтээлч хандахгүй байх

Таны нийтэлсэн контентийн тайлбар тухайн контентийг амилуулагч, үзэгчид саатан харах шалтгааны 50 хувь болдог тул хагас дутуу эсвэл хэт нуршуу байх нь зохимжгүй. Сайтар эргэцүүлсэн, час хийсэн тайлбар бичих аваас контент тань амилж, дагагчид тань хариу үйлдэл үзүүлэх үндэс болно.

Ингэхийн тулд:

• Тухайн контенттойгоо авцалдахуйц тайлбар байх,
• Анхаарал татахуйц, хурц, сэтгэл хөдөлгөхүйц үг хэллэг, өнгө аястай байх,
• Хаштаг болон эможи ашиглах,
• Сall to action өнгө аястай тайлбар бичих. Өөрөөр хэлбэл ямар нэгэн үйлдэлд уриалан дуудсан бүтээлч тайлбар,
• Харин дараа нь алдаа мадагыг нягтлахгүй байх аваас үг, үсэг, агуулгыг өчүүхэн алдаа нь таны үнэлэмжийг үгүй хийнэ.

Дагагчдынхаа эргэх холбоог хангахгүй байх

Хэрэв та гэртээ үдэшлэг зохиочхоод тэдний сонирхлыг өдөөх ямар нэгэн зүйл зохиохгүй, хоол унд өгөхгүй байвал тэд цагаасаа өмнө яваад өгнө биз дээ? 

Энэ бол дагагчдадаа анхаарал хандуулахгүй, хувиа хичээсэн байдлын илэрхийлэл. Хэрэв та бизнес эрхлэгч бол сэтгэгдэл бичих, стори-д чинь хариу үлдээх, DM бичих үндсийг хангах пост, тайлбар хийх хэрэгтэй. 

Дагагчдынхаа оролцоог хангахгүй, тэдэнтэй харилцаа үүсгэхгүй байх нь монолог хийж байгаатай агаар нэг. Үүнийг блоггер, влоггер зэрэг контент бүтээгч байнга санууштай. Тиймээс таны контентийн niche буюу зорилтот хэрэглэгчидтэйгээ эргэх холбоот харилцаа үүсгэх хэрэгтэй.

Стратегигүйгээр инстаграмаа хөтлөх

Авахын тулд эхлээд өгч сурах гэдэг философи инстаграмын алгоритмд ч хэрэгжинэ. Та хандалтаа нэмэгдүүлж, дагагчаа өсгөхийн тулд өөрийн цаг хугацаа, сэтгэгдлээ харамгүй зориулж сурах хэрэгтэй. 

• Хэрэв та зөв стратегиар, хаягаа үр ашигтай, ухаалаг хөгжүүлбэл олны танил биш байсан ч энэ ертөнцийн од болон гялалзана,
• Өдөрт ядаж 10 минутыг цагийн хүрдэнд чинь харагдсан зураг, бичлэгийг үзэж, зүрх дарах эс бөгөөс сэтгэгдэл үлдээх хэрэгтэй,
• Өөрийн чинь niche буюу зорилтот дагагчдаа (эдгээр хэрэглэгчдийг хаштаг-аар дамжуулан олох боломжтой) эргэх холбоонд татан оролцуулахад цаг хугацаа, ур ухаанаа зориулах,
• Контентонд чинь үлдээсэн дагагчдын сэтгэгдэлд хариу бичиж, дагагчидтайгаа харилцаа өрнүүлэх, эвсэл зургийнхаа тайлбар хэсэгт дагагчдаасаа асуулт асуух байдлаар тэдний оролцоог орхигдуулж болохгүй,
• Ямар нэгэн контент нийтлэхээс өмнө 15-20 минутыг бусад хаягуудыг, бусдын постыг үзэж, хариу үйлдэл үзүүлэх, сэтгэгдэл үлдээх байдлаар тухайн контентийн нэг хэсэг болон оролцох аваас хүмүүс таны постыг илүү хурдан үзэх болно. Учир нь та тэдний постод оролцсон учраас таны хаяг руу эргээд орж үзэх нь ойлгомжтой.

Тохиромжтой хаштаг ашиглахгүй байх

Хаштаг-ын тусламжтай та niche буюу өөрийн зорилтот дагагчдыг татах боломжтой. Тухайн постныхоо агуулгатай нийцэх топ 9 хаштаг-ыг л оновчтой ашиглаж чадсан тохиолдолд таны пост  зорилтот буюу ижил сонирхолтой хэрэглэгчдэд хүрч чадна.

Та бусдын постын хаштаг-ыг ухамсаргүйгээр хуулбарлах нь таны постны engagemant-ийг нэмэгдүүлэхэд туслахгүй. Хэрэв та гоо сайхны бүтээгдэхүүний нөлөөлөгч бол #beauty, гэрэл зургийн салбарт сонирхолтой бол #photogrpahy, аялах хоббитой бол #travel, #adventure гэх зэрэг контентийн тань агуулгад нийцах хаштаг ашиглах нь ижил сонирхол хоббитой хүмүүс таныг олох магадлалыг нэмэгдүүлнэ.

Ямар хаштаг үр дүнтэй болохыг мэдэхгүй байвал хайлтын хэсэг дээр түлхүүр үгээ бичвэл таны хандалт болоод engagement-ийг өсгөх олон арван хаштаг-ын цувааг инстаграм санал болгоно.

Инстаграм хаяг дээрээ лайв, стори, видео нийтлэхгүй байх

Та ядаж сард нэг удаа инстаграм дээрээ лайв хийснээр дагагчдад чинь мэдэгдэл очиж, таны хаягийг тэдэнд хоногшуулах үндэс болно. Өөрийн амьдралын хэв маяг, эсвэл бүтээгдэхүүн, үйлчилгээгээ сурталчлахаас гадна асуулт хариултын замаар харилцаа үүсгэх, тэдэнд үнэ цэнэтэй мэдээлэл өгөх хэрэгтэй. 

Стори-ны тухайд бидний гаргадаг дараагийн алдаа бол стори-гоо онцлохгүй байх буюу өөрийн хэв маягаа сурталчлахад зориулсан боломжийг ашиглахгүй байх явдал юм

Инстаграмаа хаягаа бизнесийнх болгож өөрчлөхгүй байх

Хэрэв та бүтээгдэхүүн, үйлчилгээндээ зориулж буюу бизнесийн зорилгоор инсаграм хөтөлж байгаа бол нэн тэргүүний алхам бол тохиргоог нь бизнесийнх болгосноор хэмжээлшгүй боломжийг эдэлнэ. Инстаграмд бүртгэлтэй хэрэглэгчдийн хаягийн 80 хувь нь бизнесийн платформ байдаг. Учир нь инстаграм нь танд шинэ хэрэглэгчтэй болох, хандалтаа хянах, дотоод үзүүлэлт зэрэг өргөн боломжуудыг олгодог. Хаягаа ингэж өөрчилснөөр контентийн чинь агуулгад нийцсэн стил, форматыг санал болгох зэрэг инстаграмын сурталчилгааны feature–үүдийг ашиглах боломжтой.