Бэрхшээлийг “бахархал” болгосон уран бүтээлч Л.Золбоо, С.Намуунцэцэг нар үзэсгэлэнгээ дэлгэж байна  
Та өөрийн оршин буй нийгмээ хэр сайн мэдэх вэ, тантай зэрэгцэн амьдарч буй “өөр” хүмүүсийн талаар та ямар ойлголттой вэ?  
Уншигт та ганц удаа ч болов энэ талаар эргэцүүлж үзсэн үү? Тэгвэл эдгээр асуултын хариултыг уран зураг болон компьютер графикаар хослуулан илэрхийлж, нийгэмд өөрсдийн адил “өөр” хүмүүсийг өрөвдөх үзлийг бахархлаар сольсон, уран бүтээлч бол Л.Золбоо, С.Намуунцэцэг нар юм.

Тэд хамтарсан үзэсгэлэнгээ энэ сарын 20-23-нд Хүүхдийн урлан бүтээх төвийн Орд Галерейд дэлгэж байна.  
Л.Золбоо, С.Намуунаа хоёр үзэсгэлэнгийнхээ нээлтэнд “хөгжлийн бэрхшээл” гэсэн бидний дутуу бодлыг улаан туузын хамт хайчилж, тэдэн шиг олон залуусын сэтгэлд урам зориг бадраасан. Энэ үзэсгэлэнгийн ач холбогдол нь хөгжлийн бэрхшээлтэй иргэдийн авьяас чадварын нийгэмд таниулах, залууст үлгэр дуурайлал болох, нийгэмд урлагийг үнэлэх ,ойлгох үзлийг төлөвшүүлэхэд оршино. 

Л.Золбоо 2012 онд Дүрслэх урлаг, дизайны Анима коллежийг зураач мэрэгжлээр төгссөн бөгөөд 12 жил зурж буй. Түүний хувьд Монгол ахуй, байгаль дэлхийн гоо үзэсгэлэн, тусгай хэрэгцээт иргэдийн амьдрал, хүсэл мөрөөдлийн талаар уран бүтээлдээ илүү тод томруун тусгадаг.

Харин С.Намуунцэцэг 2017 онд тус сургуулийг төгссөн, хөлөөрөө зурдаг авьяастай бүсгүй. Түүний зургийн сэдэв ихэвчлэн цэцэгс болон шувуудын ертөнц байдаг.