Ажил хэрэгч залуучуудын хувьд хувцаслалт тэр дундаа барьж буй цүнх нь тэдний ертөнцийн илэрхийлэл гэж хэлж болно. 

Орчин үед залуучууд үнэтэй брэнд гэхээс илүүтэй өөрийгөө илэрхийлж болох ажил хэрэгч үүргэвч, тааран, даавуун материалтай, чөлөөт загварын цүнхийг илүүд үзэх болсон. Бүх цаг үеийн хамгийн ажил хэрэгч цүнхнүүд элдэв брэндийн шошгогүй, энгийн байгааг та доорх жишээнүүдээс харж болно. Өдөр тутамдаа барих цүнхээ сонгохдоо гялгар, лакан, гоёл чимэглэл ихтэй загвараас татгалзахыг стилистүүд зөвлөдөг.  

ДУНД ХЭМЖЭЭТЭЙ - “ТОТЕ” ЦҮНХ

Дунд зэргийн хэмжээтэй, трапец эсвэл тэгш өнцөгт хэлбэртэй тоте цүнх эрэгтэй, эмэгтэй загвартай. Намхан ултай гутал, кет эсвэл өндөр өсгийт дээр гайхалтай зохицдог. Зөөврийн компьютер, ipad, усны сав, тэмдэглэлийн дэвтэр зэргийг нэг дор багтаах минимал загвартай эдгээр цүнх таныг хариуцлагатай, эмх цэгцтэй, албархаг харагдуулна. Ганц товчтой, цахилгаантай, онгорхой, гоёмсог эсвэл минимал, савхин болон арьсан загваруудаас та сонгох боломжтой.

“CROSSBODY” БУЮУ ТАШУУЛДАЖ ҮҮРЭХ МАТТ ЦҮНХ

Даавуун уут шиг хэлбэртэй ч илүү сонгодог загвартай, хүн болгоны төдийлөн сонгоод байдаггүй энэ цүнх ямар ч төрлийн хувцсанд сайхан зохино. Ажилд төдийгүй хэдийд ч үүрэх боломжтой тул нэг авчихад урт хугацааны хөрөнгө оруулалт гэсэн үг.

МАТТ ҮҮРГЭВЧ

Оффис хослол, савхи, пальто, цув, хүрэм гээд ямар төрлийн гадуур хувцсан дээр үүрсэн таныг ажил хэрэгч, залуу харагдуулна. Олон тасалгаатай тул таныг эмх цэгцтэй байлгахад чухал үүрэг гүйцэтгэнэ. 
     

ТОТЕ ЦҮНХ + УРТ ООСОР = СОНГОДОГ ТОТЕ

Бүгдийг нэг дор багтаагч тоте цүнхний хамгийн эрэлттэй, дэгжин загварт тооцогддог нь сонгодог тоте-ийн эрэгтэй, эмэгтэй загварууд бүх цаг үеийн хамгийн борлуулалт өндөртэй  цүнх юм.  
    

САГСАН ЦҮНХ

Ажилдаа, аялал зугаалгад, амралтын өдөр, дэлгүүр хэсэхдээ үүрэхэд тохиромжтой загвар.  

ЖИЖИГ ЦҮНХ

Овор хэмжээ багатай, олон чимэглэлгүй тул ажил хэрэгч уулзалт, хүлээн авалт, үдэшлэгний үеэр таныг нямбай, нууцлаг нэгэн мэт харагдуулна. 
      

ХАВТСАН ЦҮНХ

Утас, ipad, түрийвч, нэрийн хуудас зэргийг л багтаах  ийм цүнх ажил хэрэгч залуу/бүсгүй таныг минималист харагдуулна.

СОНГОДОГ ГЭХДЭЭ ХУУЧИНСАГ БИШ

Хатуу ч биш бас зөөлөн ч биш хэрнээ нугарамтгай, урт оосор бүхий арьсан цүнх ямрав дээ. Ямар ч үед цүнхэндээ баригдахгүй өөрийнхөөрөө байх боломжийг танд олгоно. Хамгийн гол нь ажил хэрэгч гэдгийг тань тодотгоно. 
   

ТААРАН БОЛОВЧ АЖИЛ ХЭРЭГЧ

Та энгийн харагдах дуртай бол тааран  цүнхээр ажил хэрэгч  болж гоёх нь догь биш гэж үү? Тааран материал нь зөвхөн чөлөөт загвар, дэлгүүрийн тор болон гудамжны хэв загварт зориулагдаагүй юм. Форм болсон арьсан, эсвэл савхин, илгэн цүнхнүүдээс татгалзаж өөрийн гэсэн хэв маягийг ажил хэрэгч байдалтайгаа хослуулаарай.