Японы Токио хотод XXXII дахь удаагийн Олимпийн наадам эхлэхэд жил хүрэхгүй хугацаа үлджээ. Тус наадамд Монгол улс спортын 16 төрлөөр 160 тамирчин, дасгалжуулагч оролцохоор 150 бэлтгэл хангагчтай ажиллаж байна. Баг тамирчдын Олимпийн наадамд өмсөх спортын хувцасны загвар гаргах нээлттэй сонгон шалгаруулалтад Монголын загварын салбарт өөрийн тод өнгө, шинэлэг дүр төрхийг бий болгосон “Michel&Amazonka” брэнд шалгарчээ.  

Спортын нийт 13 төрлийн хувцас байгаагаас наймыг нь "Michel&Amazonka", тавыг Японы алдарт "Мизүно" брэндээр хийлгэх юм. Монгол тамирчдын ёслолын хувцасны хувьд шаргал өнгө зонхилдог бол спорт хувцасны төрөлд хөх болон цагаан өнгө давамгайлдаг онцлогтой. Тамирчдын нээлтийн ёслолын үйл ажиллагаанд өмсөх хувцасны дүн хараахан гараагүй байна. 

Эгч дүү дизайнер болох Чойгаалаагийн Янжиндулам (Michel) болон Нямханд (Amazonka) нар “Michel&Amazonka” брэндийг 2013 онд үүсгэн байгуулсан. Тус брэнд уламжлалт хэв маягийг агуулсан европ загварын хувцаснуудыг “Haute couture” болон “Prèt-a-Porter” төрлөөр Монголдоо зохион бүтээж үйлдвэрлэдэгээрээ онцлогтой.