Стилист болсон түүх гэвэл 8 жилийн өмнө Шотландын имиж мэйкр Аллисон Фэйтнэрийн туслахаар ажиллаж, үйлчлүүлэгчдийнх нь захиалсан хувцасны загварыг гаргаж, оёдог байснаас эхтэй.

Тэр үеэс Бельгид ажилладаг монгол стилистийн сургалтад сууж, дараа нь Английн имиж көүчингийн институтийг төгссөн. Харин одоо ажил хэрэгч эмэгтэйн имиж бүрдүүлэлтийн чиглэлээр сурч байна.

-Хувь хүний имижийг та хэрхэн тодорхойлох вэ?

-Имиж бол хүний гадаад дүр төрх, харилцаа, өөрийгөө илэрхийлэх чадвар болон бусдад төрүүлсэн сэтгэгдлийн нийлбэр. Тухайн хүн ярихгүйгээр, имижээрээ дамжуулж бусдад мэссеж өгч байдаг. Гүн утгаар нь авч үзвэл хүний дотоод сэтгэлтэй холбогдоно. 

Тухайн хүн гуалиг, өндөр нуруутай,  давхраатай алаг нүдтэй байх эс байхаас үл хамаарч хамгийн түрүүнд өөртөө таалагддаг байх хэрэгтэй. Хэрэв үг яриа болон үйл хөдлөл, биеэ авч явж буй байдал, дотоод сэтгэлийн хооронд уялдаа үүсэхгүй бол хүн өөрөө өөртэйгөө зөрчилдөж эхэлдэг.

Хүүхэд эхийн хэвлийд бүрэлдэх үеэс ээж аавынх нь өгсөн энерги харилцаанаас сэтгэл зүйн хувьд имиж нь бүрдэж эхэлдэг.

-Бидний амьдралд имиж хэр чухал нөлөөтэй вэ. Бид яаж хувийн имижийнхээ талаар хэрхэн эерэг хандлагатай болох вэ?

-Маш чухал нөлөөтэй. Имиж гэхээр загварлаг, трэндлэг, хээнцэр байх тухай ойлголт ерөөсөө биш. 

Хаана, хэнтэй, хэзээ ямар ажлаар уулзах гэж байгаагаас хамаарч хувцаслах, биеэ авч явах соёлоо бий болгох ёстой.

Бид ихэвчлэн өөрийн имижээ бүрдүүлчихсэн байдаг ч зарим хүн толин дох тусгалаа таалдаггүй, өөрийнхөө ямар нэг зүйлдээ сэтгэл дундуур байдгаас стресст автаж өөртөө итгэлгүй болдог. Ийм тохиолдол имиж көүчийн мэргэжилтнүүд тухайн хүний сэтгэл зүйтэй нь ажиллаж өөртөө таалагддаг болоход нь тусалдаг. Харин дараа нь ажил мэргэжил, амьдралын хэв маягаас шалтгаалж ямар стиль, имижтэй байвал өөртөө илүү таалагдах вэ гэдэг дүр төрхийг нь гаргаж өгдөг. Толинд харагдаж байгаа өөрийнхөө тусгалаа 100 хувь таалдаг болоход нь имиж көүч тусалдаг гэсэн үг. 

Дотоод сэтгэлийн гоо сайхан, гадаад төрхийн үзэмж хоёр тэнцвэржихээр хүн  өөртөө итгэлтэй, өөрийнхөөрөө байж чаддаг.

 Ямар ч настай хүн байсан имижээ олсноор тэр насандаа үзэсгэлэнтэй харагдах боломжтой.

10 жилийн өмнө би ч тэдний нэг байлаа. Миний хувцасны дийлэнх нь хар бараан, бор, хар хөх өнгөтэй байсан. Учир нь тод өнгөөр хувцаслах гэхээр зориг хүрэхгүй, өөртөө зохих өнгөө мэддэггүй байсан учраас дэлгүүрийн санал болгосон эсвэл шинэ загварын хувцас худалдаж авдаг байлаа. Хожим мэргэжлийн көүчтэй ажиллаад зөвлөгөө авч, имижээ бүрдүүлсний дараа миний хувцасны шүүгээ маш минимал болсон. 

-Хоёулаа арай нарийвчилъя. Тухайлбал, бор арьстай хүн ямар өнгөөр имижээ бүрдүүлбэл зохих вэ?

Хүн бүрийн арьсны өнгө давтагдашгүй тул бор арьстай, цайвар арьстай хүнд ийм тийм өнгө зохион гэж тодорхойлох боломжгүй. 

Яг өөртөө тохирсон өнгөө олж чадвал арьсыг нь гэрэлтүүлж, үрчлээг нь багасгаж, залуужуулж харагдуулдаг. Тухайн хүний арьсны өнгөнд анализ хийж тохирсон материал болон дулаан суурьтай өнгө зохидог уу, хүйтэн суурьтай юу, төвийг сахисан өнгө үү гэдгийг тодорхойлж өгдөг.  

Өнгөө тодорхойлсны дараа биеийн хэлбэрээ тодорхойлох хэрэгтэй байдаг. Биеийн хэлбэр дотроо 8 хэлбэртэй, Х хэлбэртэй, О хэлбэртэй, О хэлбэр дотроо алиман,  зүрхэн, лийрэн гэж 3 янз,  Н хэлбэртэй, V   хэлбэртэй гэх мэтчилэн биеийн хэлбэрийг тодорхойлдог. Биеийн хэлбэрээ мэдсэний үндсэнд тохирох хувцас үсний засалтаа сонгоно.  

Хүний имиж бүрдүүлэлтэд голлох  нөлөөлдөг хүчин зүйл бол хүний харилцаа бас үнэр тэгээд гоёл чимэглэл орно.

 Эдгээр нийлж байж гадаад төрхийг бүрдүүлж дотоод сэтгэл хосолж тухайн хүний ажил мэргэжил, амьдралын хэв маягт тохируулан мэргэжлийн хүн гаргаж өгдөг.

Уулзалт, баяр ёслол, үдэшлэгт явах бүртээ шинэ даашинз авах шаардлагагүй. Байгаа хувцас, даашинз, гоёл чимэглэлээрээ хэрхэн дэгжин атлаа тухтай хувцаслахаа, өөртөө итгэлтэй харагдахаа мэддэг болно гэсэн үг. Сүүлийн хоёр жилийн хугацаанд өмсөөгүй хувцаснаасаа салж, хувцасны шүүгээндээ зай гаргахыг би үйлчлүүлэгчдэдээ зөвлөдөг. Юм цөөхөн байх тусмаа сэтгэхгүй д эрх чөлөө өгдөг шүү дээ.  

-Таны ажигласнаар монгол эмэгтэйчүүд имиж бүрдүүлэлтдээ түлхүү ямар алдаа гаргадаг вэ?

-Хамгийн энгийн жишээ бол өөртөө тохирсон өнгөө мэдэхгүй байх явдал. Монголд минимал стиль гэхээр хар, цагаан, бейж, саарал өнгөнүүдийг сонгож хэрэглэх нь ажиглагддаг. 

Гэхдээ уйтгартай, танд аз жаргал мэдрүүлэхгүй бол тэгж хувцасла гэсэн дүрэм байхгүй шүү дээ. 

Тухайлбал, би өөрт зохидог өнгийн байгальд ээлтэй, генийн өөрчлөлтөд ороогүй, биед эвтэйхэн хувцас худалдан авахыг эрмэлздэг. Монголд брэндийн хэрэглээ ихэссэн атлаа түүнийг хэрхэн зөв хэрэглэхээ мэддэггүй, брэндүүдийг хооронд нь хольж өмссөн нь харагддаг. 

Chanel-ийн цүнх үүрээд, Dior-ийн нүдний шил зүүсэн атлаа burberry-гийн цув өмсөөд, lоuis vuitton-ий гутал өмссөн "Сурталчилгааны самбар" явж байгаа юм шиг л бүсгүйтэй таарах нь энүүхэнд. 

Брэндээр өөрийгөө бүрчихээр тухайн хүнтэй харилцаа үүсгэхэд саад болдог. 

Брэнд хольж өмссөн хүмүүс өөрийгөө хувцаслалтын наад захын мэдлэггүй, брэнд шүтдэг хүн гэсэн ойлголтыг хүмүүст төрүүлдэг. 

Ганц л зүйлээ тодотговол дэгжин харагдана. Даашинзан дээрээ gucci-гийн бүсээс өөр брэнд хослуулах шаардлагагүй гэсэн үг л дээ. Мөн үнэтэй аксесуар зүүсэн атлаа хуван ээмэг, төмөр гоёлыг хослуулах нь зохимжгүй харагддаг.  

-Та байгальд ээлтэй хувцас хэрэглэхийг илүүд үздэг гэлээ.  Манайд улсад “Fast fashison” (тренд дагасан хурдан хувцаслалт)-ий импорт зонхилж байгаа энэ үед байгальд ээлтэй хувцсыг хэрхэн сонгох талаар уншигчдад маань зөвлөгөө өгвөл?

-“Fast fashison”-д Zara, Mango гэхчлэн буурай хөгжилтэй оронд хүний хөдөлмөрийг үнэлээгүй, байгалийг “мөлжсөн” үйлдвэрлэлийг хэлж болно. Францад гэхэд тренд дагасан "түргэн хувцас" өмсдөг хүн ховор. Яагаад минимал эсвэл эко хувцаслах гэж байгаа зорилгоо тодорхойлж, би аз жаргалтай болох уу гэдгээ бодсоны үндсэн дээр сонголтоо хийгээрэй гэж зөвлөе.  

-Цаг гарган ярилцсанд баярлалаа. Танд амжилт хүсье.

-Баярлалаа. Монгол бүсгүйчүүд маань өнгөтэй өөдтэй, өөртэй итгэлтэй, өөрийнхөө үнэ цэнийг мэддэг байгаасай гэж хүсэж байна.