2020 оны 5 дугаар сараас эхлэн шинэ нисэх буудлын хурдны замаар Монголд угсарсан суудлын автомашин давхихаар болж байгаа баярт мэдээг  наадамчин олондоо хүргэж байна. 

Шинэ нисэх буудлыг түшиглэсэн хот барих төслийг сүүлийн 4 жил хөөцөлдөж буй олон улсын төслийн баг Монголд суудлын автомашин угсрах үйлдвэр байгуулах төслийн  санамж бичгийг энэ сарын 8-ны өдөр “Нэг бүс, нэг зам” төслийн эхлэл хот болох БНХАУ-ын Ханжоуд байгууллаа.

Уг төслийн хүрээнд Япон, Тайванийн хөрөнгө оруулалттай “Юлон групп” болон БНХАУ-ын “Донгфень” компанитай хамтран “АГТ Ауто” ХХК-ыг байгуулан жилд 1000 гаруй автомашин угсрах хүчин чадалтай  үйлдвэрийг энэ онд багтаан ашиглалтанд оруулна. 

Эхний 100 машиныг 2020 оны 4 сард үйлдвэрээс гаргах зорилт тавьжээ.

2020 онд Монгол улсад үйлдвэрлэх дунд гарын жип машин нь “Luxgen Legend” /Luxurious, Genius and Legendary/ гэдэг хамтарсан брэнд нэртэй байна. 

Аж үйлдвэрийн 4 дүгээр хувьсгалыг эх орондоо эхлүүлсэн энэ төсөл хэрэглэгчдэд автомашиныг боломжийн үнээр борлуулна.

Бид нийт  автомашины 92 гаран хувийг Япон улсаас импортолдог. 

Импортын дийлэнх машинууд насжилт өндөртэй тул хүний амь нас, эрүүл мэнд, хүрээлэн буй орчин, хөрсний бохирдол болон асар их дуу чимээний бохирдлыг бий болгодог. 

Шинээр угсарсан автомашин хэрэглээнд нэвтэрснээр дээрх эрсдэлийг бууруулах боломжтой.