Өнгөрсөн долоо хоногт болсон Үндсэн хуулийн цэцийн дарга Д.Одбаяр болон түүнийг дагалдан явсан А нарын Кореан Эйр компанийн онгоцны үйлчлэгч эмэгтэйд бэлгийн дарамт үзүүлсэн дуулиан намдаагүй байна.

Үндсэн хуулийн цэцээс уг хэрэг нь ташаа болохыг мэдэгдсэн ч Солонгосын тал буруутгасаар байгаа юм.

Уг хэрэг үнэн бол Солонгос улс өөрсдийн хуулиар шийтгэх бөгөөд манайд энэхүү тохиолдолд хариуцлага хүлээлгэх хууль эрхзүйн орчин байхгүй аж. Ямартай ч үнэн тогтоогдох нь тодорхой тул энэ асуудлыг хойш тавин бэлгийн дарамтын талаар цөөн мэдээлэл хүргэе.

ТА БЭЛГИЙН ДАРАМТАД ОРСНОО МЭДЭХГҮЙ БАЙГАА ЮМ БИШ БИЗ?

Бэлгийн дарамт гэдэг нь бусдыг хүсээгүй байхад өөрийн бэлгийн сэдлээ үг хэлээр, биеэр илэрхийлсэн, хурьцал үйлдэхээс аргагүй байдалд оруулахыг хэлнэ. Үүнд,

-Бэлгийн харилцаатай холбоотой доог тохуу хийх,

-Гудамжинд явж байхад элдвээр дуудах,

-Онигоо ярих,

-Биеийн нууц, онцгой хэсгүүдэд хүрэх, тэврэх, гэх мэт үйлдлүүд ордог. 

Бэлгийн дарамт нь зөвхөн ажлын байр гэлтгүй гэр, сургууль, сүм гэх мэт ямар ч орчинд үүсч болдог.

Хохирогч нь зөвхөн эмэгтэйчүүд биш эрэгтэй хүн ч байж болдог. Бэлгийн дарамтын хамгийн сүүлийн шатны буюу хүнд хэлбэр бол хүчин юм. Иргэд бэлгийн дарамт, хүчин хоёрыг андуурах тохиолдол их байдаг.

Энэ төрлийн гэмт хэргүүдээс сэрэмжлэх, цаашид арилгах хамгийн бодит алхам бол боловсрол юм. Нийгмийн соёлтой иргэн байхад баримтлавал зохих ёс суртахууны хэм хэмжээг эцэг эх, шат шатны багш нар хамтран хүнд багаас нь ойлгуулан, заах явдал юм. Давхар хуулиар шийтгэдэг, зохих ёсны хариуцлага хүлээлгэдэг байх хэрэгтэй.

                             ТӨРИЙН АЛБАН ТУШААЛТНУУДТАЙ ХОЛБООТОЙ БУСАД ОРНЫ ЖИШЭЭ

• 2016 онд АНУ-ын 138 төрийн өндөр албан тушаалтан эмэгтэйчүүдэд бэлгийн дарамт үзүүлснийг тогтоожээ. Эдгээр ажилтны дөрөвний гурав нь албан тушаалаасаа огцорсон байна. Харин заримд нь өндөр торгууль ногдуулж, эрүүгийн хэрэг үүсгэн шүүх ажиллагаа явуулжээ. Гэхдээ энэ бол хохирогчид хууль хяналтын байгууллагад мэдээлж, ил тод болсон тоо. Үүний цанаа хэчнээн албан хаагч ажлын байран дээрээ болон албан тушаалаа ашиглаж бусдыг хүчирхийлж, бэлгийн дарамт үзүүлснийг таашгүй.
• Мөн онд АНУ-ын Колорадо мужийн сенатч Рэнди Баумгарднер туслах эмэгтэйгээ тэврэх гэж оролдсон, өгзгийг нь алгадсан гэх хэрэгт холбогдсон. Тэрээр хэргийг үгүйсгэж байсан ч хууль хяналтын байгууллагаар нотлогдсон тул өөрийн хүсэлтээр албан тушаалаасаа огцорч, уг хэрэг хаагдсан. Хэрэв сенатч өөрийн хүсэлтээр огцроогүй нөхцөлд парламентийн гишүүд уг хэргийн талаар хэлэлцэн албан тушаалаас нь огцруулах байсан.
• Анх АНУ бэлгийн дарамтыг хууль зөрчсөн үйлдэл болохыг тогтоож, бие даасан хууль гаргасан бөгөөд өдгөө дэлхийн ихэнх орнууд мөн адил хуульчилжээ. Гэхдээ хуультай байлаа гээд гэмт хэрэг арилна гэж үгүйг дээрх жишээ харуулж байна. Давхар боловсролын асуудал хөндөгдөх учиртай. Учир нь зарим үед гэмт этгээд бусдад бэлгийн дарамт үзүүлж буйгаа өөрөө ч мэдээгүй тохиолдол их байдаг гэсэн судалгаа бий.  
• Мөн ажлын байрны бэлгийн дарамтад өртөгсдийн дийлэнх нь хэргийн талаар цагдаад мэдээлдэггүй, нуугаад өнгөрдөг. Гол шалтгаан нь тэд ажлаа, нэр төрөө алдахаас айдаг, хэргийг илчиллээ гээд юу ч өөрчлөгдөхгүй гэж боддог гэжээ. Учир нь дийлэнх бэлгийн дарамт үзүүлэгчид өндөр албан тушаалтан, ажил олгогч эсвэл илүү эрх мэдэлтэй нэгэн байдаг.