Удирдлага дор буй хүмүүстээ үүрэг томилж сурах нь үр дүнтэй дарга нарын нэгэн чухал шинж билээ. Ажлыг хуваан даалгаснаар дарга нар ажилчдаа хөгжүүлээд зогсохгүй өөрийн эрч хүчийг өндөр ач холбогдолтой чухал зүйлст төвлөрүүлэх боломжийг гаргах юм. Үр дүнтэй удирдан зохион байгуулагчдын хүмүүст ажил даалгахдаа баримталдаг нийтлэг найман зарчмыг танд хүргэж байна:

1. Зөв хүнийг сонгох– “Хэн чадах вэ” гэдгийг бодох нь хангалтгүй
Хэн шинэ чадварт суралцах хэрэгтэй вэ? Хэнд үүнийг хийх хүсэл зориг байна вэ? Хэнд энэ сорилт үр өгөөжтэй вэ? Хэнд шинэ үүрэг шагнал болох вэ гэдгийг зарим үед харгалзан үзэх хэрэгтэй. Мөн тухайн хүнд яагаад уг ажлыг даалгасныг тайлбарлах нь ажилтны урам зоригийг нэмэгдүүлдэг.

2. Ажилтны эрх мэдлийн хүрээг тодорхой тогтоох
Хүмүүс өөрийн цаг хугацаа, ажил, арга барил, хамтран ажиллагсад зэрэгт бүрэн хяналттай байхыг ямагт эрэлхийлдэг байна. Тиймээс ухаалаг дарга нар хүний сэтгэлзүйн уг онцлогийг ашиглаж, ажил хүлээн авч буй хүмүүст яг ямар хэмжээний эрх мэдлийн хүрээлэл байгааг ойлгуулан тайлбарладаг ажээ.

3. Гаргах ёстой үр дүнг тодорхой тайлбарлах
Ямар ажлыг яагаад хийж байгаа, түүний үр дүн нь ямар байх ёстойг тодорхой тайлбарлаарай. Удирдлагын зүгээс ямар хүлээлттэй байгаа, ажлын үр дүн байгууллагын ерөнхий зорилгод хэрхэн нийцэж буй, амжилтыг хэрхэн хэмжих зэргийг ойлгомжтой байлгах нь туйлын чухал юм.

4. Ажил хийх нөхцөл боломжийг бүрдүүлэх
Аливаа ажилд үр дүн гаргахад туслалцаа, цаг хугацаа, ажиллах орон зай ямагт шаардагддаг. Үүний зэрэгцээ ажилчдад хэрэгцээтэй сургалт, хөрөнгө оруулалт, байгууллагын нөөц баялаг зэргийг зарцуулах бэлтгэлтэй байх хэрэгтэй.

5. Үр дүнг хэмжих цэгүүд тогтоох
Ажилчид үр дүнгээ тайлагнах тогтсон хугацаа, тодорхой амжилтад хүрсний дараа удирдлагуудад мэдээлж байх “шалган өнгөрөөх” цэгүүдийг урьдчилан гаргаарай. Ингэснээр ажилчдад хандах дарга удирдлагуудын анхаарал хяналт алдагдахгүй байхын зэрэгцээ тэдгээр хүмүүст үүргээ гүйцэтгэх орон зайг бий болгодог.

6. Шинэлэг, бүтээлч шийдэлд нээлттэй байх
Аливаа даалгаврыг биелүүлэх цорын ганц зөв зам гэж үгүй. Өнгөрсөн үеийн арга барилд хэт их ач холбогдол өгөх нь цөөнгүй дарга нарын гаргадаг алдаа юм. Ийнхүү туйлшрах нь асуудалд хандах шинэ өнцөг, өвөрмөц шийдлүүд гарч ирэх боломжийг хаадаг. Тиймээс өөр хандлага, шинэлэг санаачлагыг эрэлхийлж, дэмжих нь зүйтэй.

7. Ажиллахад таатай уур амьсгал бүрдүүлэх
Сайн удирдан зохион байгуулагчийн нэг шинж нь хүмүүсийг хэзээ хэрхэн өдөөхөө мэдэх явдал юм. Цагаа олсон урамшуулал, зөвлөмж, албан тушаал, орон зай, төлөвлөгөөнд өөрчлөлт оруулах, уулзалт зэрэг нь ажлын эрч хүчийг эрс нэмэгдүүлдэг.

8. Эрсдэлээс зугтаахгүй байх 
Эрсдэлийг эрс буруушааж, алдааг ажилчдынхаа мэдлэг чадваргүйн баталгаа болгон тунхагладаг буруу хандлагатай дарга нар бий. Харин та эдгээр тохиолдлуудыг суралцан сайжрах боломж болгон хувиргах, дахин давтахгүй байх шийдэл эрэлхийлэхэд ашиглаарай.

Эх сурвалж: Harvard Business Review