“Улаанбаатар” зочид буудлын ерөнхий менежер, "Балдорж сан"-гийн тэргүүн, www.unuudur.mn Ерөнхий эрхлэгч, Монголньюс медиагруппын дэд захирал Б.Номинтүшиг хэл сурах арга барилынхаа талаар ингэж хэллээ.  

"Би англи, орос хэлтэй. Намайг дөрөвдүгээр анги хүртэл орос сургуульд явуулсан. Дараа нь англи хэл сурсан. Хятад, Франц хэл ойлгох ч сайн ярьж чадахгүй.  

Хэл сурах арга барилын тухайд гэвэл дүрэм үзэх нь үр дүнгүй санагддаг. Түүний оронд англи хэлээр телевиз үзэх, хөгжим сонсвол өгөөжтэй. Би орос сургуулиас шилжихэд англи хэл мэддэггүй байсан. Тэгээд “Friends” киног зогсоо зайгүй үзсэн. Сүүлдээ уг киноны гол дүрүүдийн хэв маягаар ярьдаг болчихсон байлаа.

Тэгэхээр зовж бус сонирхолтой, хөнгөн арга барилаар сурвал илүү үр дүнтэй гэж боддог. Би дөрөвдүгээр ангиас орос хэлээ үзээгүй ч мэдээллийг үргэлж тухайн хэлээр авдаг байсан.  

Тийм ч учраас өнөөдрийг хүртэл марталгүй өдөр тутмын хэрэглээгээ болгосон.  

Хятад хэлийг бол Тайваны “F4” киног үзэж сурсан. Нөгөө талаас залуучууд гадаад хэлээс гадна эх хэлээ сайн сурах ёстой гэж боддог. Яагаад гэвэл хүн төрөлх хэлээрээ алдаагүй, зөв ярьж бичиж чаддаг байх зайлшгүй шаардлагатай" гэсэн юм.