ЭМЯ-ны хэвлэлийн хурлын үеэр ХӨСҮТ-ийн ерөнхий захирал Д.Нямхүү 217 хүний шинжилгээнээс коронавиурисийн халдвар илрээгүй хэмээн мэдээллээ. 

Мөн "Өчигдөр буюу дөрөвдүгээр сарын 30-нд улсын хэмжээнд сэжигтэй тохиолдол бүртгэгдээгүй. Нийт 217 хүнд шинжилгээ хийсэн бөгөөд бүх шинжилгээнээс коронаврус илрээгүй. Тодруулбал,

• ХӨСҮТ-д тусгаарлагдсан 23 хүний давтан шинжилгээ
• Тандалтаар 74 хүнд хийсэн шинжилгээ,
• Дархан-Уул аймгийн лабораторид ОХУ-аас Алтанбулагийн боомтоор орж ирсэн тээврийн 21 жолооч, ажиглалтад тусгаарлагдаж байсан 99 хүнд давтан шинжилгээ хийлээ. Эдгээрт бүгдэд нь коронаврус илрээгүй.

Эхний тусгай үүргийн онгоцыг хүлээж авсан бөгөөд 5 хүнийг ХӨСҮТ-д сэжигтэй хэмээн үзээд тусгаарлалаа. Өнөөдөр эхний ээлжний хүмүүст шинжилгээ хийнэ. Дараагийн ирэх хоёр тусгай үүргийн онгоцонд онцгой анхаарлаа хандуулна" гэв. 

ЭМЯ-ны Олон нийттэй харилцах, тандалт шуурхай удирдлагын хэлтсийн дарга Д.Нарангэрэл "Сүүлийн 24 цагийн байдлаар дэлхийн 2  оронд халдвар илэрч, 215 оронд бүртгэгдлээ. Өчигдөр тусгай үүргийн онгоцоор 278 хүн ирж, өнөөдрийн байдлаар нийт 776 хүн тусгаарлалтад байна. Сургалтын төвүүдийн үйл ажиллагааг нээж буйтай холбоотойгоор ЭМЯ-наас зөвлөмж гаргасан. ДЭМБ-ын судалгаанд нийт халдварын 40 гаруй хувь нь ажлын орчинд тархсан байна" гэв.    

ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа "Өнгөрсөн 24 цагийн хугацаанд Бразил улсад 7000 тохиолдол бүртгэгдсэн бол ОХУ-д мөн 7000 гаруй халдварын тохиолдол бүртгэгдсэн аж. ХБНГУ-д PCR шинжилгээний хүчин чадлаа нэмэгдүүлж, 860 гаруй шинжилгээг хийх боломжтой болжээ. Тус улсын нас баралтын түвшин дөрвөн хувь болж нэмэгджээ" гэв.