Эрүүл мэндийн яамны хэвлэлийн хурлын үеэр ХӨСҮТ-ийн ерөнхий захирал Д.Нямхүү 156 хүнд шинжилгээ хийхэд ОХУ-аас ирсэн нэг оюутнаас халдвар илэрлээ хэмээн мэдээллээ. 

Мөн тэрээр "Өнөөдөр нэг оюутан эдгэрч сувилалд шилжлээ. Мөн Туркийн хоёр иргэний ажиглалтын хугацаагаа дуусч, гэртээ гарлаа. 

ХӨСҮТ-д 115 хүн эмчилгээнд, 89 хүн хяналт, ажиглалтад байна. Эмчилгээнд байгаа хүмүүсээс 23-ынх нь биеийн байдал хүндэвтэр байна. 8-16 насны 5 хүүхэд эмчилгээнд байгаа" гэв. 

Ийнхүү манай оронд коронавирусийн халдварын батлагдсан тохиолдол 136 боллоо.

ЭМЯ-ны Тандалт, шуурхай удирдлагын хэлтсийн дарга Д.Нарангэрэл "Коронавирус 216 орны 4,7 сая хүн халдвар авч, 1,7 сая хүн эдгэрлээ. Сүүлийн 24 цагийн байдлаар дэлхий дахинд 95 мянган тохиолдол бүртгэгдлээ. 

Манай улсын хувьд 108 хүн ажиглалтад орж, нийт 1748 хүн ажиглалтад байна. 119 тоот утсанд 192 дуудлага ирсний тав нь гадаадаас залгаж, халдвараас хэрхэн урьдчилан сэргийлэх талаар зөвлөгөө авчээ" хэмээн онцоллоо. 

БНСУ-ын шөнийн цэнгээний газраас тархсан халдвар 9-өөр нэмэгджээ

ЭМЯ-ны Гадаад харилцааны хэлтсийн дарга Б.Янжмаа "ОХУ-ын нийт халдварын тохиолдол 272 мянга давлаа. Япон улсад 57 мянган шинэ тохиолдол, 19 нас баралт бүртгэгджээ.

БНСУ-ын хувьд шөнийн цэнгээний газраас улбаатай халдварын тохиолдол 9-өөр нэмэгдэж, 162 боллоо. Тус улсад мөн 4 шинэ тохиолдол гаднаас зөөвөрлөгдөн орж иржээ" гэв.