ЭМЯ-ны хэвлэлийн хурлын үеэр ХӨСҮТ-ийн ерөнхий захирал Д.Нямхүү "Өчигдөр 247 хүний сорьцонд шинжилгээ хийхэд бүх хариу сөрөг буюу коронавирус илрээгүй хэмээн мэдээллээ. 

Мөн "Дээрх шинжилгээний хариунуудыг задалж хэлбэл, ХӨСҮТ-д тугаарлагдсан 13 хүн, Орхон аймагт тусгаарлагдсан нэг хүний давтан шинжилгээ, ажиглах байранд тусгаарлагдсан 160, Замын-үүдэд тусгаарлагдсан 5, тандалтын зорилгоор авсан 32 хүний шинжилгээ байна. Мөн Алтанбулан боомтоор орж ирсэн 36 жолоочид шинжилгээ хийхэд коронавирус илрээгүй байна. 

Монгол Улсад батлагдсан тохиолдол 140, үүнээс эдгэрсэн 26 хүн байгаа. Өвчтөнүүдийн биеийн байдлыг үнэлэхэд 87 нь хөнгөн байгаа бол 27 хүний биеийн байдал хүндэвтэр байна" хэмээн онцоллоо. 

ЭМЯ-ны Тандалт, шуурхай удирдлагын хэлтсийн дарга Д.Нарангэрэл "Сүүлийн 24 цагийн хугацаанд дэлхий дахинд 94 мянга гаруй хүн халдвар авч, 4000 гаруй хүн нас баржээ. ОХУ-д 9000 гаруй тохиолдол бүртгэгдсэн гэх үзүүлэлттэй байна. 119 тоот дугаарт 264 дуудлага ирсэн байна" гэв.  

ЭМЯ-ны Гадаад харилцааны хэлтсийн дарга Б.Янжмаа "Халдварын тохиолдлын тоогоор АНУ, Бразил, ОХУ тэргүүлж байна. Бразил улсад 17 мянган тохиолдол бүртгэгдэж, нийт тохиолдлын тоо 271 мянга давлаа. БНСУ-д шөнийн цэнгээний газрын халдварын тархалтыг хязгаарласан ч нэгэн эмнэлгээс халдвар тархсан байх магадлалтай хэмээн мэдээлжээ" гэв.