Напал буюу зууван навчит кактус нь Мексикийн цөлөрхөг бүс, Америкийн баруун өмнөд хэсгүүдээр элбэг ургадаг. Энэхүү ургамлыг Мексикийн ард түмэн үндэсний зоог болох начо болон тортилла хийхдээ ашиглахаас гадна салат зуушинд ч мөн өргөн хэрэглэдэг байна. Харин нутгийн ард иргэд кактусын эцсийн хаягдлыг био түлшний эх үүсвэрт хэрэглэх санааг олжээ.

Мексик улсын иргэн Соса Лопез эрдэнэ шиштэй тортилла худалдах бизнесээ явуулах үедээ эрдэнэ шишийг орлуулах түүхий эд олсон нь напал кактус байв.  Улмаар тэд напал кактусыг тариалахад үржил шим багатай газрын нэг га тутамд  300-400 тонн, үржил шимтэй газрын нэг га-д 800-1000 тонн био масс ялгаруулдаг болохыг олж тогтоожээ.

Био масс нь сэргээгдэх эрчим хүчний эх үүсвэр юм. Био масс буюу биологийн материалыг түлш, дулаан үйлдвэрлэхийн тулд боловсруулан үйлдвэрт ашигладаг.  Энэ утгаараа напал кактусыг “ногоон алт” хэмээн нэрийдэх болсон аж.

Мексикийн мэргэжилтнүүд мөн авакодагийн хаягдлаар био түлш хийхээр туршилт хийж байгаа юм.

Эх сурвалж: BBC