Арабын Нэгдсэн Эмират улсын нийслэл Дубай хотноо Азийн залуучуудын V пара наадам амжилттай болж өнгөрлөө. Манай улсаас пара хөнгөн атлетикийн төрөлд 12, бочигийн спортод тав, пауэрлифтингээр нэг тамирчин оролцож гурван алт, гурван мөнгө, хоёр хүрэл медаль хүртсэн амжилт үзүүллээ. 

Дэлхийн залуучуудын рекордын эзэн ОУХМ Д.Жигмэд пауэрлифтингийн эрэгтэйчүүдийн 54 кг-ын жинд алт, хөнгөн атлетикийн тамирчин Г.Ган-Эрдэнэ бөөрөнцөг түлхэлт болон зээрэнцэг шидэлтийн төрөлд алт, Н.Амин-Эрдэнэ зээрэнцэг шидэлт болон бөөрөнцөг түлхэлтийн төрөлд мөнгө, С.Энх-Амгалан 800 метрийн гүйлтийн ангилалд мөнгө, М.Хүсэл-Эрдэнэ 800 метрийн гүйлтийн ангилалд хүрэл, бочи спортын тамирчин Д.Дагмидмаа хүрэл медалийг тус тус хүртжээ. 

Тус наадамд Азийн 35 орны 1,500 баг тамирчин 11 спортын төрөлд 481 медалийн төлөө өрсөлдсөн байна.