ЭМЯ-ны хэвлэлийн хурлын үеэр ХӨСҮТ-ийн ерөнхий захирал Д.Нямхүү  "Өчигдөр нийт 369 хүнд шинжилгээ хийхэд 351 хүний шинжилгээнд коронавирус илрээгүй. 

Харин тавдугаар сарын 28-нд Алтанбулагийн боомтоор орж ирсэн 18 хүнээс коронавирус илэрлээ. Ийнхүү батлагдсан 179 тохиолдол бүртгэгдлээ" хэмээн мэдээллээ. 

ЭМЯ-ны Олон нийттэй харилцах, тандалт шуурхай удирдлагын хэлтсийн дарга Д.Нарангэрэл "Сүүлийн 24 цагийн байдлаар дэлхийн 216 орны 5,9 сая хүн халдвар авч, 2,5 сая хүн эдгэрчээ. Манай улсад өчигдөр 289 хүн ажиглалтад шинээр орж, 1908 хүн ажиглалтад байна. 

Шуурхай 119 дугаарт 448 дуудлага ирснээс Швед, Франц, Чех, ОХУ-аас 19 хүн холбогджээ" гэв.  

ЭМЯ-ны Гадаад харилцааны хэлтсийн дарга Б.Янжмаа "Өчигдөр ОХУ-д 8371 тохиолдол шинээр бүртгэгдэж, 174 хүн нас барлаа. 

Харин Бразил улсад нэг өдөрт хамгийн их буюу 24151 тохиолдол бүртгэгдсэн байна. БНСУ-д соёл үйлчилгээний газруудын үйл ажиллагааг 14 хоног зогсоолоо.

Хөл хориог сулруулах нь эрсдэл дагуулж буйг БНСУ-ын жишээнээс харж болно" гэв.