Нийслэлийн Засаг дарга бөгөөд Улаанбаатар хотын Захирагч С.Амарсайхан УИХ-ын 2020 сонгуульд УИХ- ын гишүүнээр сонгогдон, өчигдөр гишүүний тангарагаа өргөсөн билээ.

Нийслэлийн Засаг даргаар сонгогдон 460 хоног ажиллахдаа олон асуудлыг шийдэж, чамгүй амжилттай ажилласан. Харин өнөөдөр хотын даргын ажлынхаа тайланг мэдээлж Нийслэлийн Засаг даргын тамгаа, бодлогын баримт бичгийн хамт Нийслэлийн Засаг даргын Хөгжлийн бодлогын асуудал хариуцсан нэгдүгээр орлогч Ж.Батбаясгаланд хүлээлгэн өглөө.  

Хотын дараагийн даргыг сонгох хүртэл буюу орон нутгийн сонгууль дуустал Ж.Батбаясгалан хотын даргын ажлыг түр үүрэг гүйцэтгэх юм.

УИХ-ын гишүүн С.Амарсайхан: "Энэ бол зөвхөн хотын захирагчийн тамгыг шилжүүлэн өгч байгаа хэрэг биш. Өнгөрсөн хугацаанд нийслэлчүүдтэйгээ хамтран хэрэгжүүлж эхэлсэн олон бүтээн байгуулалт, төсөл хөтөлбөрүүдийг үргэлжлүүлэн гүйцэтгэх их үүрэг хариуцлагыг давхар хүлээлгэн өгч буй хэрэг билээ. Хүнээ дээдэлсэн, иргэндээ ээлтэй, хотыг зохицлоох нь хүн бүрийн хүсэл юм шүү" гэдгийг онцлон хэлэв.