УИХ-ын ээлжит сонгуулиар олонх болсон намаас Монгол Улсын Ерөнхий сайдыг сонгодог билээ. 

Үүний дагуу өчигдөр МАН-ын бага хурлаар нийт гишүүдийн 100 хувийн саналаар У.Хүрэлсүхийг Ерөнхий сайдаар сонгохыг дэмжсэн. Үндсэн хуульд зааснаар энэ тогтоолыг Монгол Улсын Ерөнхийлөгчид өргөн мэдүүлж, ерөнхийлөгч 5 хоногийн дотор  саналаа УИХ-д оруулж, баталдаг. 

Өнөөдрийн УИХ-ын чуулганд оролцсон 71 гишүүний 70 нь дэмжсэнээр Ухнаагийн Хүрэлсүх хоёр дахь удаагаа Монгол Улсын Ерөнхий сайдаар сонгогдлоо.

У.Хүрэлсүх: "Манай улсын ард иргэдээ, МУ-ын Ерөнхийлөгч өө, Та бид туурга тусгаар улсынхаа төрийг сонголоо. Бидэнд итгэл үзүүлсэн ард түмэндээ баярлалаа. Ард түмнийхээ итгэлийг зүтгэлээр хариулах цаг ирлээ. Манай ард түмэн төр барих эрхээ эдэлж, задарсныг засагладаг, ядарсныг хайрладаг төртэй байхыг хүслээ. Ирж буй жилүүдэд банкны салбарт реформ хийж зээлийн хүүг сарын 1 хувьд хүргэхийн төлөө шат дараатай ажилиллана гэв." гэлээ.