Онцгой байдлын ерөнхий газар, Шинжлэх ухаан, технологийн их сургуулийн хамтын ажиллагааны хүрээнд төв, орон нутгийн Онцгой байдлын байгууллагын холбоо, мэдээллийн технологийн алба хаагчдыг чадавхжуулах сургалт, дадлагыг энэ сарын 01-03-ны өдрүүдэд ШУТИС-ын Мэдээлэл, холбооны технологийн сургуульд зохион байгууллаа.

Алба хаагчдад ШУТИС-ийн профессор, доктор, эрдэмтэн судлаачид сүүлийн үеийн мэдээллийн технологийн дэвшил, систем архитектур, кибер аюулгүй байдлаас хамгаалах, радио холбоог зохион байгуулах, нисгэгчгүй нисэх төхөөрөмжийн бүтэц, зохион байгуулалтын талаар мэдлэг олгосон юм.

Энэ үеэр ОБЕГ-ын Холбоо, мэдээллийн технологийн газрын дарга, хошууч П.Отгонпүрэв хэлсэн үгэндээ “Онцгой байдлын байгууллагаас сүүлийн үеийн шинэ техник, технологи, инновацыг үйл ажиллагаандаа нэвтрүүлэхэд онцгой анхаарч, ажиллаж байна. Үүний нэг тод жишээ бол “Монгол Улсад эрт зарлан мэдээллийн нэгдсэн системийг бэхжүүлэх” төсөл юм. Тус төсөл хэрэгжсэнээр үндэсний хэмжээнд гамшгийн аюулыг зарлан мэдээлэх нэгдсэн систем бий болж, гамшгаас урьдчилан сэргийлэх, эрт сэрэмжлүүлэх үйл ажиллагаанд Онцгой байдлын байгууллага болон иргэд, олон нийтийн оролцоо, чадавхыг нэмэгдүүлнэ. Мэдээлэл, харилцаа холбооны технологи нь Онцгой байдлын байгууллагын хөгжлийн ирээдүйг тодорхойлогч чухал тулгуур тул энэхүү сургалтаар олж авсан мэдлэг, ур чадвараа ажлын байрандаа үр дүнтэй ашиглаж, байгууллагынхаа хөгжил, дэвшилд үнэтэй хувь нэмэр оруулна гэдэгт итгэлтэй байна” гэлээ.

Энэхүү сургалтыг онол, практик хослуулж, лабораторийн бодит дадлага бүхий хэлбэрээр зохион байгуулсан нь өмнөх сургалтуудаас өргөн цар хүрээ, мэргэжлийн түвшинд гэдгээрээ онцлог байлаа.

Эх сурвалж:ОБЕГ