Худгийн шавар цэвэрлэхээр ороод гацсан хүнийг эсэн мэнд аварчээ. Тодруулбал Булган аймгийн Баяннуур сумын нутагт худгийн шавар цэвэрлэхээр орсон нэг хүн лаг шаварт шигдэж хөдөлж чадахгүй байна гэх дуудлага Онцгой байдлын албанд иржээ. 

Дуудлагын дагуу тус аймгийн Онцгой байдлын газрын Дашинчилэн сум дахь Эрэн хайх, аврах бүлэг, аймгийн Онцгой байдлын газрын Эрэн хайх аврах салбарын алба хаагчид, Баяннуур сумын Тамгын газрын даргаар ахлуулсан иргэд, Цагдаагийн хэсэг, Эрүүл мэндийн төв, “Булган АЗЗА” ТӨХК-ийн нийт 30 гаруй хүн, 20 орчим техник хэрэгсэлтэйгээр ажиллаж, 1х1 метрийн харьцаатай, дөрвөн метрийн гүнтэй худгийн лаг шаварт биеийн бүсэлхий хэсэг хүртэл шигдсэн байсан 30 настай  иргэн  Б-г эсэн мэнд гаргаж, сумын Эрүүл мэндийн төвд хүлээлгэн өгсөн. Эрүүл мэндийн төвөөс иргэний биеийн байдал тогтвортой, хэвийн гэж эргэн мэдээлсэн байна.