Засгийн газрын ээлжит бус хуралдаан болж, хуралдаанаас гаргасан шийдвэрийг Ерөнхий сайд Л.Оюун-Эрдэнэ, Шадар сайд С.Амарсайхан, Эрүүл мэндийн сайд С.Энхболд Сангийн сайд Б.Жавхлан нар танилцуулж байна. Улаанбаатар хотод энэ сарын 10-25-ны хооронд хатуу хөл хорио тогтоох УОК-ын саналыг Засгийн газар дэмжжээ.

Ерөнхий сайд Л.Оюун-Эрдэнэ: Засгийн газар эхний 100 хоногтоо вакцинжуулалтын ажлыг эхлүүлсэн. Өнөөдөр Монгол Улс дархлаажуулалтын хурдаар Азидаа тэргүүлж байна. Цаашдаа вакцинжуулалтыг эрчимжүүлэх зайлшгүй шаардлага байна. Вакцины хэлэлцээр амжилттай дууссан. Дархлаажуулах ёстой хүн амаа вакцинд хамруулах вакцины хэлэлцээр хийж дууссан. Одоо татан авах цаг хугацааны асуудал байна. Вакциныг үе шаттай татахгүй бол бөөнөөр нь татах боломж байхгүй. Долдугаар сарын 1-н гэхэд шаардлагатай бүх иргэнээ вакцинжуулах зорилт тавиад ажиллаж байна. Хоёр дахь тунгаа авсны дараа 14-21 хоногийн дараа дархлаа тогтоно. Тиймээс Засгийн газар 15 хоногийн хугацаанд хатуу хөл хорио тогтоохыг дэмжсэн. Засгийн газар хөл хорио тогтоохгүй байхын төлөө бүхий л нөөц боломжоо шавхаж ажилласан. Үүний үр дүнд эдийн засагт эерэг үзүүлэлт гарч эхэлсэн. Энэ таатай үр дүнгээ 14 хоногийн хугацаанд алдахгүй авч явахын төлөө ажиллана. Энэ хөл хорио сүүлчийн хорио байгаасай гэж хүсч байна. Вакцинаас үл хамаарах нөхцөл байдал үүсвэл түүнийг амлах боломжгүй гэв.

Бүх нийтийн бэлэн байдлын зэрэгт шилжсэн хугацаанд голомтыг хумьж тархалтыг хязгаарлахыг зорино. Хатуу хөл хорио тогтоохгүй бол  04 дүгээр сарын дунд үед өдөрт 1000 хүн халдварт өртөж, 20 гаруй хүн нас барна гэсэн тооцооллыг тархвар судлаачид гаргасан байна. Иймээс эрсдэлийг хоёроос гурав дахин бууруулахын тулд Засгийн газар дараах шийдвэрийг гаргалаа.

Бэлэн байдлын 4 зэрэг байдгаас хамгийн сүүлийнх нь БҮХ НИЙТИЙН БЭЛЭН БАЙДЛЫН ЗЭРЭГ буюу улаан түвшин юм.  

Энэ түвшинд:

ТӨРИЙН ХЯЗГААРЛАХГҮЙ ҮЙЛ АЖИЛЛАГАА:

• Төрийн байгууллага (ажилтан, албан хаагчийн 5-10 хүртэл хувь ажиллах, цагийн хязгаар тогтоох)
• Эрүүл мэндийн байгууллага
• Тусгайлсан чиг үүрэг бүхий байгууллагууд (Байгаль орчныг хамгаалах, гааль, дипломат алба, онцгой байдал, мэргэжлийн хяналт, Зэвсэгт хүчин бусад цэрэг, татвар, тусгай алба, гадааадын иргэн, харьяат, улсын бүртгэл, цагдаа, шүүхийн шийдвэр гүйцэтгэх)
• Шүүх, прокурор, өмгөөлөл, нотариат
• Улсын онц чухал болон стратегийн ач холбогдол бүхий объект, байгууллага (тусгай цагийн хуваарьтай ажиллах, 207 оны 281 дүгээр тогтоолыг баримтлах)
• Эрчим хүч, дулаан, усан хангамж, ариутгал, нийтийн аж ахуй,
• Шуудан харилцаа холбоо
• Шатахуун, түлшний үйлдвэрлэл, хангамж, нийлүүлэлт, түгээлт, тусгай зөвшөөрөл бүхий байгууллагын түлшний тээвэрлэлт, худалдаа
• Геологи, хайгуул, уул уурхай, газрын тосны олборлолт
• Зайны сургалт, хүүхэд хамгааллын үйлчилгээ, асрамж, халамж, түр хамгаалах байр, Монголын улаан загалмай нийгэмлэг
• Цахим банк, автомат тооцооны машин
• Газар тариалан, мал, амьтны өвс, тэжээлийн түгээлт, тээвэрлэлт

ХУУЛИЙН ЭТГЭЭДИЙН ХЯЗГААРЛАХГҮЙ ҮЙЛ АЖИЛЛАГАА:

• Эрчим хүч, дулаан, усан хангамж
• Эрүүл мэндийн байгууллага, эмийн сан, эм эмнэлгийн хэрэгсэл ханган нийлүүлэх байгууллага
• Өмгөөлөл, нотариат
• Шатахуун, түлшний хангамж,
• Хүнс, ахуйн хэрэглээний үйлдвэрлэл, худалдаа, тээвэрлэлт, ачилт, цуглуулалт, тээвэрлэлт
• Цахим банк, автомат тооцооны машин
• Газар тариалан, мал, амьтны өвс, тэжээлийн түгээлт, тээвэрлэлт
• Харилцаа холбоо, шуудан илгээмж
• Улсын онц чухал болон стратегийн ач холбогдол бүхий объект, тусгайлсан чиг үүрэг бүхий байгууллагын үйл ажиллагааг тасралтгүй хангах аж ахуйн нэгж, байгууллагын үйл ажиллагаа (эрх бүхий байгууллагын зөвшөөрснөөр)
• Хэвлэл мэдээлэл (эрх хязгаарлах)
• Эрх бүхий байгууллагын зөвшөөрөлтэй харуул хамгаалалтын байгууллага
• Геологи, хайгуул, уул уурхай, газрын тосны олборлолт
• Орон сууц, нийтийн үйлчилгээний контор, сууц өмчлөгчдийн холбоо
• Буяны үйл ажиллагаа

ИРГЭНИЙ ХЯЗГААРЛАХГҮЙ ҮЙЛ АЖИЛЛАГАА:

• Эмнэлгийн зайлшгүй тусламж, эмийн сан
• Өмгөөлөл, нотариат
• Түлш худалдан авах
• Хүнс, ахуйн хэрэглээний бараа бүтээгдэхүүн худалдан авах
• Газар тариалан
• Зөөврийн ус
• Шинжилгээ өгөх
• Буяны үйл ажиллагаа