Голын мөс цөмөрч тээврийн хэрэгсэл мөсөнд суужээ. Тодруулбал Завхан аймгийн Алдархаан сумын нутаг аймгийн төвөөс баруун хойд зүгт 25 км, сумын төвөөс зүүн урд зүгт 20 км-ын зайд  Алдархаан сумаас Завхан аймгийн чиглэлд зорчиж явсан иргэн О-ын эзэмшлийн автомашин голын мөс цөмөрч явах боломжгүй болсон тухай дуудлага Онцгой байдлын албанд иржээ. 

Дуудлагын дагуу аймгийн Онцгой байдлын газрын 43 дугаар ангийн алба хаагчдыг очиход “Bongo” загварын ачааны автомашин голын мөс цөмөрч суусан байсныг татан гаргаж, хүлээлгэн өгсөн байна. 

Гол, нууруудын мөсний зузаан харилцан адилгүй хөлдсөн, зарим хэсгээр хүн болон тээврийн хэрэгсэл даах хэмжээнд очоогүй байгаа тул зам товчлох нэрийдлээр мөсөн дээгүүр тээврийн хэрэгсэлтэй зорчихгүй байхыг анхааруулж байна.