Боловсролын яам, НҮБ-ын Хүүхдийн Сан хамтран “Цахим аялал” интерактив хичээлийг сургалтын системд нэвтрүүлсэн. Энэхүү төсөлд Боловсролын яам, НҮБ-ын Хүүхдийн Сан болон уран бүтээлчдийн баг хамтран ажиллаж байгаа.

Хүүхдийн нас, сэтгэлзүйн хөгжлийн онцлогт нийцүүлэн тэдний оролцоог дэмжсэн, сонирхолтой, бүтээлч байдлаар хүргэж буй интерактив хичээл хэрхэн бүтдэг талаарх мэдээллийг хүргэж байна. Тухайн контентод ямар түүх өгүүлэх, үйл явдлын дарааллыг хэрхэн холбох, ямар тоглоом байх зэргийг шийдэх хамгийн чухал зүйл. Мэдээж энэхүү агуулгыг зохиолч, контент хөгжүүлэгчээс гадна Боловсролын ерөнхий газрын мэргэжилтнүүд, багш нар, НҮБ-ын Хүүхдийн Сангийн мэргэжилтнүүд зөвлөж, хамтран ажилладаг. 

Хичээлийн агуулгатай тохирох шинэ тоглоомын судалгааг мэргэжлийн баг хийдэг. Олон судалгаанаас үндэслэн агуулгад нийцэх тоглоомыг төслийн багийнхан сонгож дараагийн хөгжүүлэлтийг эхлүүлнэ. Тоглоомын зураг дүрс, анимэйшн, дуу хоолой зэргийг мэргэжлийн баг хамт олон гүйцэтгэнэ. Харин мэргэжлийн багш нар тоглоомын заавар, өгөгдөл, дасгал даалгаврыг бэлтгэж өгдөг аж.

Уран бүтээлчдийн багийн зүгээс интерактив хичээлийн тоглоом тоглох үйлдлийг хялбаршуулж байгаа. Хүүхдүүд хот, хөдөө гээд хаанаас ч “Цахим аялал” хичээлээ үзэхэд гацахгүй, ямар нэгэн бэрхшээл гаргахгүй байх зорилгоор интерактив хичээлээ гар утасны тоглоомоос ч жижиг хэмжээтэй болгож Medle.mn сайтад байршуулж байна. 

Харин зургийн багийнхан бага насны хүүхдийн онцлогийг судалж тэдний сонирхдог зургийн хэв маягт тохируулан зургийн дизайнаа гаргадаг. Зураачид дүр, ар талд гарах ерөнхий зураг, эд зүйлс, деталь зэргийг зурна. Үүний дараа аниматорууд дүрийг хөдөлгөөнд оруулсны дараа эвлүүлгийн ажил эхэлнэ.

Олон шат дамжлага, мэргэжлийн уран бүтээлч, багш мэргэжилтнүүдийн аргазүйн зөвлөгөө нэг цогц бүтээл болж “Цахим аялал” интерактив хичээлийг хүүхэд багачууддаа хүргэж байна.