Цаг уур, орчны шинжилгээний газраас нэгдүгээр сарын 27-оос хоёрдугаар сарын 5-ны өдрийг хүртэлх цаг агаарын төлөв байдлыг танилцууллаа. Энэ 10 хоногийн хугацаанд Алтай, Хангай, Хөвсгөл, Хэнтийн уулархаг нутгаар ялимгүй цастай байх ба нутгийн зүүн хагаст хүйтний эрч хэвээр хадгалагдана. 

28-нд Хөвсгөл, Хэнтийн уулархаг нутаг болон Орхон, Сэлэнгийн сав газраар 29-нд төвийн аймгууд болон говийн аймгуудын зүүн хойд хэсгээр, 30-нд Алтай, Хангай, Хөвсгөл, Хэнтийн уулархаг нутгаар 31-нд Хөвсгөл, Хэнтийн уулархаг нутаг болон Халх голын сав газраар цас орно. 

Харин ирэх сарын 1-нд нутгийн хойд хэсгээр 2-нд төв, говь болон зүүн аймгуудын нутгаар 3-нд Халх голын сав газраар цас орно. 

Агаарын хэмийн хувьд Увс нуур, Дархадын хотгор, Идэр, Тэс голын хөндийгөөр шөнөдөө -38...-43, өдөртөө -28...-33 градусын хүйтэн байна. Харин томоохон голын хөндийгөөр шөнөдөө -30....-35, өдөртөө -20...-25 хүйтэн байна. Говийн бүс нутгийн өмнөд хэсгээр шөнөдөө -14...-19, өдөртөө -6...-11 бусад нутгаар шөнөдөө -23...-28, өдөртөө -11...-16 градус хүйтэн байна. 

Өнгөрөгч долоо хоногт хамгийн хүйтэн нь Завхан аймгийн Отгон суманд -44 градус хүрчээ.