Монголын үндэсний бөхийн холбоо шинэчлэлийн хөтөлбөрийн хүрээнд томоохон барилдаануудад чансааны оноо олгох журмыг хэрэгжүүлэхээр болсон. Улирлын системд шилжиж, барилдааны чансаа тогтоох болсны дагуу 2025 оны эхний чансааг танилцууллаа.
Чансааг улсын заан С.Сүхбат 2,400 оноогоор тэргүүлсэн бол улсын начин Ч.Чулуунбат 2,350 оноотойгоор удаалав. Түүний араас аварга О.Хангай, улсын арслан Ц.Бямба-Отгон, улсын начин Д.Амарсайхан, аймгийн арслан Н.Өсөхбаяр, улсын харцага Э.Даш, улсын начин Э.Батмагнай, улсын заан М.Лхагвагэрэл, аймгийн арслан Д.Алтанцоож нар эхний 10-т жагслаа.
Энэхүү чансаанд 390 бөх бичигдсэн ба улирлын нээлтийн барилдаан, Нийслэл Улаанбаатар хотын 385 жилийн ойн барилдаан, Монгол Бахархлын өдрийн барилдаан, Улс тунхагласан өдрийн барилдаан, Үндэсний эрх чөлөө, тусгаар тогтнолоо сэргээн мандуулсны ой, Ерөнхийлөгчийн нэрэмжит цомын төлөөх барилдаануудын дүнг харгалзан гаргажээ.
МҮБХ-ноос баталсан цаглаварын дагуу өндөр зэрэглэлтэй бөхчүүдийн чансаа тогтоох барилдааныг сард хоёр удаа, намраас хаврын улиралд нийт 16-18 удаа зохион байгуулахаар төлөвлөөд байгаа гэнэ.
0
| 
85
Сэтгүүлч: П.Цанжид
| 
