Дөрөө нуурын мөс цөмөрч ачааны автомашин суужээ. Тодруулбал Хөвсгөл аймгийн Рашаант сумын нутаг  “Дөрөө” нуурын мөс цөмөрч С-ийн “Hyundai Mighty” загварын 2.5 тонн даацтай ачааны автомашины тэвш хэсэг орсон тухай дуудлага аймгийн Онцгой байдлын албанд ирсэн байна. 

Дуудлагын дагуу тус аймгийн Онцгой байдлын газрын Аврах салбарын алба хаагчдыг очиход, “Mighty-2” загварын ачааны автомашины хойд буюу ачааны хэсэг нуурын мөс рүү цөмөрч далд орсон байдалтай байсныг зургаан цаг 15 минут ажиллан, автомашиныг татан гаргаж жолоочид нь хүлээлгэн өгчээ. 

Манай орны ихэнх гол, мөрний мөсний зузаан тогтвортой нэмэгдэж байгаа ч өнгөрөгч оны мөн үе болон олон жилийн дунджаас 5-35см бага, мөсний зузаан голын нийт уртын дагууд харилцан адилгүй, мөсний даац хүн, мал, машин тэрэг явахад хангалттай хэмжээнд хүрч бэхжээгүй байгаа тул цаг хожих, зам товчлох зэргээр мөсөн дээгүүр явах болон авто тээвэр хийхгүй байхыг онцгойлон анхааруулж байна.