Голын усанд осолдсон иргэдийг эрэн хайх ажиллагаа үргэлжилж байна. Дорнод аймгийн Хэрлэн сумын нутаг "Хэрлэн" голын усанд сэлэх гэж ороод живсэн тухай дуудлага аймгийн онцгой байдлын албанд наймдугаар сарын 3-ны өдөр ирсэн. 

Дуудлагын дагуу аймгийн Онцгой байдлын газрын Эрэн хайх, аврах ангийн алба хаагчид иргэн 25 настай эрэгтэй О-г эрэн хайх ажиллагааг 5-ны өдрийн 05:00 цагаас осолдсон газраас Баянтүмэн сумын Жаргалант багийн “Өндөр-Эрэг” гэдэг газар хүртэл 70 км зайд гурван удаагийн давтамжтай голын усаар завиар урсаж зохион байгуулж байгаа гэнэ. 

Мөн Хөвсгөл аймаг, Рэнчинлхүмбэ сум “Тэнгис-Шишгэд”-ын голд гурван хүн моторт завиар зугаалж яваад завь нь хөмөрч хоёр хүн нь эсэн мэнд гарч, нэг хүн нь осолдсон тухай дуудлагыг наймдугаар сарын 3-нд хүлээн авсан. Хөвсгөл аймгийн Онцгой байдлын газрын Эрэн хайх, аврах салбарын алба хаагчид, Агаараас эрэн хайх, аврах ангийн 111 дүгээр анги, Үндэсний аврах бригадын алба хаагчид ар гэрийнхэний хамт 36 настай эрэгтэй П-г  эрэн хайх ажлыг зохион байгуулж байна.