“Парис-2024” зуны Олимпын наадмын чөлөөт болон сонгомол барилдаанууд өнөөдөр эхэлнэ. Сонгомолын 68 кг-ын жинд "Белград-2023" дэлхийн аварга шалгаруулах тэмцээний мөнгөн медальт, Ази тивийн мөнгө, хүрэл медальт, Үндэсний шигшээ багийн тамирчин, ОУХМ Э.Дэлгэрмаа өрсөлдөнө.

Манай бөх эхний барилдаанаа Олимпын хүрэл, дэлхийн аваргын алтан медальт Киргизстаны бөх Мээрим Жаманзароватай учраа таарсан. Ялбал Япон, Венесуэлийн бөхчүүдийн ялсантай нь хоёр дахь барилдаанаа хийнэ. Сонирхуулахад Киргизын бөх Токио-2020 олимпын наадамд манай бөх С. Батцэцэгийг хүрэл медалийн төлөөх барилдаанд ялж байсан юм.