Орон нутгийн замд гарсан зам тээврийн ослын улмаас нэг хүн нас баржээ. Хэнтий аймгийн Жаргалтхаан сум Баян-Эрдэнэ багийн нутагт ачааны автомашинууд мөргөлдөж автомашины төмөр эд ангид нэг хүн хавчуулагдан нас барсан тухай дуудлагыг 07.07-ны өдрийн 18:47 цагт Онцгой байдлын албанд иржээ. 

Дуудлагын дагуу аймгийн Онцгой байдлын газрын Жаргалтхаан суман дахь Эрэн хайх аврах бүлгийн алба хаагчдыг очиход Улаанбаатар хотоос Сүхбаатар аймгийн чиглэлд зорчиж явсан иргэн Ц-ын  “Супергрэт” загварын ачааны автомашины араас, Улаанбаатар хотоос Дорнод аймгийн чиглэлд зорчиж явсан иргэн П-ийн “Бонго-3” бага оврын ачааны автомашин мөргөж 48 настай эрэгтэй П автомашины бүхээгт хавчуулагдан нас барсан тул цогцсыг гаргаж, Шүүхийн шинжилгээний хэлтсийн бүрэлдэхүүнд шилжүүлэн өгсөн байна.

Амралт, зугаалгын цаг ирж орон нутгийн замын хөдөлгөөн эрс нэмэгдсэн тул та бүхэн тээврийн хэрэгслийн хурдыг тохируулж хөдөлгөөнд оролцохыг анхааруулж байна.