Өчигдөр буюу 2024.06.25-ны өдөр Үндэсний эвслийн сонгуулийн төв штабт ЦЕГ-аас нэгжлэг, шалгалт хийсэнтэй холбогдуулан цагдаагийн байгууллагаас дараах мэдээллийг өглөө. 

ЦЕГ-ын Хэвлэл мэдээллийн төвийн дарга Г.Пүрэвдэлгэр

Сонгуулийн сурталчилгаа хийх албан ёсны эрх аваагүй, хуурамч хаягаар үйл ажиллагаа явуулж байгаа нь тогтоогдсон. Сонгуулийн тухай хуульд зааснаар нам, эвсэл, нэр дэвшигчийн талаар сурталчилгаа цахим орчинд явуулахаар бол тэр хаягаа СЕХ-нд бүртгүүлэх ёстой. Өчигдрийн ажиллагааны хүрээнд илтэд хуурамч нэг төхөөрөмж дээр 5-7 хаяг бий болгосон байсан. Мөн үзлэгийн явцад тухайн байрнаас 41,985 хүний регистер, утасны дугаар бүхий хувь хүний мэдээллийг агуулсан файл олдсон. Энэ нь хуулиар хориотой гэмт хэргийн шинжтэй үйлдэл. Тухайн хүмүүсийн мэдээллийг хэрхэн хаанаас олж авсан талаар Цагдаагийн байгууллагаас мөрдөн шалгах ажиллагааг зохион байгуулж байна. 

Тус газарт 148 хүн ажиллаж байсан. Үндэсний эвслийн хуульч ярихдаа манай ухуулагч нар байсан талаар хэвлэл мэдээлэл тайлбар өгсөн. Мөрдөн шалгах ажиллагааны хүрээнд эрх бүхий байгууллагаас лавлагаа авсан. СЕХ-оос ирүүлсэн албан бичигт 148 иргэнээс нэр бүхий хоёр иргэн сонгуулийн ухуулагчаар бүртгэлтэй нь тогтоогдсон.