УИХ-ын ес дэх удаагийн сонгуулийн сурталчилгаа өнөөдөр 00:00 цагт албан ёсоор дуусна. Нэр дэвшигчдэд үнэмлэх олгосон өдөр буюу зургаадугаар сарын 10-аас сурталчилгаа эхэлсэн ба 16 хоногийн турш үргэлжиллээ. 

Энэ удаагийн сонгууль томсгосон тойргоор болж байгаагаар онцлог байлаа. 

Сонгуулийн өдөр энэ баасан гараг буюу зургаадугаар сарын 28-нд болно. Санал авах байранд өглөөний 07:00 цагаас оройн 22:00 цаг хүртэл үргэлжлэх юм. 

Сонгуулийн тухай хуульд:

• 47.10.Нэр дэвшигч болон нам, эвсэл нь энэ хуулийн 47.1.1, 47.1.2-т заасан цахим хуудсаа энэ хуулийн 39.1-д заасан сонгуулийн сурталчилгаа дуусах хугацаанд хаана.

• 47.11.Харилцаа холбооны зохицуулах хороо нь Сонгуулийн ерөнхий хорооны саналыг үндэслэн цахим орчин дахь олон нийтийн сүлжээний хандалтыг хязгаарлах, тархалтыг бууруулах технологийн арга хэмжээг сонгуулийн сурталчилгаа дууссан өдрөөс санал авах өдрийн дараах өдөр хүртэл авч болно.

Цахим орчин ашиглан сонгуулийн сурталчилгаа явуулах журамд:

• 5.2.3.нам, эвсэл, нэр дэвшигчийн сурталчилгааг сонгуулийн сурталчилгаа дууссан өдрөөс сонгуулийн санал авах өдрийн дараах өдөр хүртэл хугацаанд түр хязгаарлах буюу сонгогчдод харагдахгүй болгох технологийн арга хэмжээ авах
• 5.2.4.сонгуулийн сурталчилгаа хийсэн тохиолдолд сонгуулийн сурталчилгааг захиалсан этгээд болон сонгуулийн сурталчилгааны төлбөрийн талаарх мэдээлэл агуулсан тайланг сонгуулийн санал хураах өдрийн дараа өдрөөс хойш 30 хоногийн дотор Сонгуулийн ерөнхий хорооноос баталсан Сонгуулийн сурталчилгаа явуулсан тайлангийн загварын дагуу бэлтгэж, Сонгуулийн ерөнхий хороонд хүргүүлэх;