Соёлын биет өв болох бурхан, шашны зан үйл, түүхийн ач холбогдолтой эд зүйлсийг хулгайлж, гадаадын иргэнд худалдан борлуулах гэж байсан этгээдийн хэргийг шүүхэд шилжүүлэхээр болжээ. 

Хэргийг сануулбал Сүхбаатар аймгийн Баяндэлгэр сумын оршин суугч Г-ийн гэрээс 2016 онд соёлын биет өв болох бурхан, шашны зан үйл, түүхийн ач холбогдолтой 82 ширхэг эд зүйлс хулгайд алдагдсан. Хэргийг үйлдсэн иргэн "Б" долоон жилийн дараа буюу өнгөрөгч оны 10 дугаар сард "Өгөөмөр" захын орчимд иргэн "З"-д худалдахаар тохиролцсон. Иргэн "З" нь цааш дамжуулж БНХАУ-ын иргэнд худалдан борлуулсан нь мөрдөн байцаалтаар тогтоогдсон байна. 

Хэрэгт мөрдөн шалгах ажиллагааг явуулж иргэн “Б”-ийн үйлдэлд Эрүүгийн хуулийн дагуу соёлын биет өвийн хууль бус худалдааг зохион байгуулсан, зуучилсан гэх хэрэгт Эрүүгийн хуулийн 25.5 дугаар зүйлийн 1 дэх хэсэгт зааснаар эрүүгийн хэрэг үүсгэж, яллагдагчаар татан, шүүхэд шилжүүлэх саналтай прокурорын байгууллагад хүргүүлжээ.