"Улаанбаатар марафон" олон улсын гүйлтийн тэмцээнийг ирэх тавдугаар сарын 25-ны Бямба гарагт Д.Сүхбаатарын талбайд зохион байгуулна. Энэхүү гүйлтийг бүтэн марафон буюу 42 км, хагас марафон буюу 21 км, 10 км, 5 км, 1.5 км болон тусгай хэрэгцээт Олимпын төрлийн 0.8 км, 0.5 км гэсэн төрлөөр зохион байгуулах юм. 

Бүртгүүлсэн иргэдийн 50-н хувь орчим нь 10 ба түүнээс дээш км-т гүйхээр бүртгүүлсэн байна. Тус марафонд өнөөдрийн байдлаар Кени, Япон, Герман, Их Британи, Франц, Орос улсын оролцогчид 42 км, 21 км зайд гүйхээр хүсэлтээ ирүүлжээ. Мөн Австрали, Австри, Америк, Англи зэрэг 22 улсын гүйгчид онлайнаар бүртгүүлсэн байна. Нийт онлайнаар 4,334 хүн хандсанаас 1,678 хүн баталгаажсан байна.

“Улаанбаатар марафон 2024” үеэр хоолны өдөрлөг зохион байгуулна. 

Марафоны хүрээнд автомашины хөдөлгөөнийг түр хугацаагаар хязгаарлана. Тодруулбал,

- Д. Сүхбаатарын талбай

- Сөүлийн гудамж,

- Партизаны гудамж,

- Бөмбөгөр худалдааны төвийн уулзвар,

- Төмөрчний гудамж,

- Гэсэр сүмийн уулзвар,

- Самбуугийн гудамж,

- Анкарагийн гудамж,

- Бага тойруу,

- Бээжингийн гудамж,

- Токиогийн гудамж,

- Сансарын туслах замаар Энхтайваны өргөн чөлөөний Зүүн дөрвөн замын уулзварын Баруун уулзвар,

- Чингисийн өргөн чөлөөний Монголын хүүхдийн ордны уулзвараас Монгол шуудангийн уулзвар болон дотогш замуудын авто машины хөдөлгөөнийг хязгаарлах юм.