Баян-Өлгий аймгийн Сагсай сумын нутагт хаагдсан зам давааг нээхээр ажиллаж байна. Тодруулбал Сагсай сумын Цагаан-Асгат гуравдугаар багийн “Хар нуур” гэх газар энэ сарын 11-13-нд их хэмжээний цасны орж Сагсай сумын 600 айл өрх, Улаанхус сумын 200 гаруй айл өрх цасанд боогдож зам даваа хаагдсан тухай дуудлага Онцгой байдлын албанд иржээ. 

Дуудлагын дагуу  аймгийн Онцгой байдлын газрын Гал түймэр унтраах, аврах 31 дүгээр ангийн алба хаагчид өчигдөр буюу энэ сарын 25-ны 09:00 цагаас эхлэн “Хар нуур” гэдэг газар гурван км замын цасыг цэвэрлэж зам гарган эхэлсэн байна. Өнөөдөр өглөөнөөс зам давааг нээх ажлыг үргэлжлүүлж байгаа гэнэ.