Хавар болж хуурайшилт нэмэгдсэнээр ой болон хээрийн түймэр гарах тохиолдлууд нэмэгдэж байна. Өчигдөр буюу энэ сарын 3-ны өдөр Ховд, Сэлэнгэ аймагт түймрийн дуудлага мэдээлэл бүртгэгдсэн байна. 

Ховд аймгийн Мянгад сумын нутагт Ховд голын эрэг дагуух хулс шатсан байна. Дуудлагын дагуу аймгийн Онцгой байдлын газрын алба хаагчид Мянгад сумын Засаг даргын Тамгын газрын ажилтнууд, тус сум дахь Цагдаагийн тасгийн алба хаагчидтай хамтран түймрийг унтраажээ. Түймрийн улмаас урьдчилсан байдлаар 15 га хулсны талбай шатсан.  

Мөн Сэлэнгэ аймаг, Баянгол сум хээрийн гал түймрийн дуудлагын дагуу аймгийн Онцгой байдлын газрын Баянгол сум дахь Гал түймэр унтраах, аврах 40 дүгээр ангийн алба хаагчид орон нутгийн иргэдтэй хамтран хээрийн гал  түймрийг унтраажээ. Урьдчилсан байдлаар 30 га хээрийн талбай шатсан.