Бүс нутгийг төлөөлсөн мал аж ахуйн цаг уурын харуулуудын хэмжилтийн мэдээнээс харахад цасны нөлөөгөөр 2023 оны арваннэгдүгээр сарын сүүлч гэхэд малын амьдын жин эрчимтэй буурч эхэлжээ. Малын тарга хүчний байдал хоёрдугаар сарын сүүлчээр ихэнх нутгаар олон жилийн дунджаас хэд дахин бага жинтэй болсон байна. Цаашид хаврын улиралд зудтай байсан нутгаар малын жин ихээр буурч, төллөх мал ядарч, улмаар малын хорогдол улам нэмэгдэх төлөвтэй байна. 

Энэ оны хоёрдугаар сарын сүүлчийн байдлаар ойт хээрийн бүс буюу Булган аймгийн Орхон суманд эм хонины амьдын жин дунджаар долоо, эм ямаа тав, үнээ 41 кг-аар буурчээ. Тал хээрийн Төв аймгийн Баян-Өнжүүл суманд эм хонь дунджаар 16, эм ямаа 11, үнээ 79 кг-аар буурсан бол говийн бүсийн Дорноговь аймгийн Дэлгэрэх суманд эм ямаа дунджаар 21 кг-аар буурсан байна. Зудын нөхцөл байдлын улмаас  Дэлгэрэхийн ямааны суурийн нийт малын 50 хувь, Баян-Өнжүүлийн хонины суурийн 45 хувь хорогджээ.