Казахстан улсад цаг агаар огцом дулаарсны улмаас их хэмжээний шар усны үер бууж, дөрвөн бүс нутгийн 12 мужид онц байдал зарлаад байна. Абай хотод үерийн улмаас сураггүй болсон гурван иргэнийг эрэн хайх ажиллагааг зохион байгуулж байгаа талаар Онцгой байдлын яамнаас мэдэгджээ. Нэг иргэн мориноос унаж нөгөө хоёр иргэн трактороор гол гатлах гэж байгаад сураггүй болжээ. Сураггүй болсон хүмүүсийг эрэн хайх ажилд шумбагчдыг татан оролцуулсан боловч цаг агаарын нөхцөл байдлын улмаас энэ ажлыг түр зогсооход хүрсэн гэнэ. 

Одоогийн байдлаар Абай, Акмола, Актобе, Костанай хотын 4,700 орчим хүнийг, түүний дотор 1,700 орчим хүүхдийг аварч, нүүлгэн шилжүүлсэн гэнэ. Үерийн улмаас 500 гаруй орон сууцны барилга зарим нутагт сургууль, эмнэлгүүд бүхэлдээ усанд автсан аж.