Экс захирал нь Авлигатай Тэмцэх Газарт яллагдагчаар татагдан шалгагдаж байгаа МҮОНРТ дараагийн ерөнхий захирлын эрэлд гарлаа. 2021 онд МҮОНРТ-ийн ерөнхий захирлаар тус телевизийн ажилтан А.Бүрэнбаатарыг томилж байсан. 

Харин түүнийг томилогдсоноос хойш удаагүй Авлигатай тэмцэх газраас хэд хэдэн хэрэгт холбогдуулан шалгаж эхэлсэн. А.Бүрэнбаатарыг МҮОНРТ-ийн удирдах албан тушаалтнаар ажиллаж байх хугацаандаа бусдаас хахууль авсан, бусдад давуу байдал бий болгосон, байгууллагад хохирол учруулсан, бусдыг залилсан гэх үндэслэлээр шалгаж хэргийг прокурорын байгууллагад шилжүүлээд байгаа. 

Тус телевизийн Үндэсний зөвлөлийн тогтоолыг үндэслэн МҮОНРТ-ийн Ерөнхий захирлын ажлын байранд нээлттэй сонгон шалгаруулалт зарлажээ. 

Нэр дэвшигчид тавигдах шаардлага:

1. Монгол Улсын иргэн;
2. Улс төрийн нам, байгууллагын гишүүн бус байх;
3. Сүүлийн 2 жилд улс төрийн нам, түүний харьяа байгууллагад орон тооны ажил, албан тушаал эрхэлж байгаагүй;
4. Бусад радио, телевизэд хөрөнгө оруулагч, эсхүл сүүлийн хоёр жилийн хугацаанд хөрөнгө оруулагч байгаагүй;
5. Ял шийтгэлгүй.
   

Бүрдүүлж ирүүлэх баримт бичиг:

1. МҮОНРТ-ийн Ерөнхий захиралд нэр дэвшүүлэхээр хүсэлт гаргагчийн анкетыг бөглөж ирүүлнэ. (mnb.mn сайтаас татаж авна уу)
2. Иргэний үнэмлэхийн хуулбар;
3. Магистр, эсхүл түүнээс дээш боловсролын зэргийн дипломын хуулбар;
4. Ажил эрхлэлтийг тодорхойлох баримт бичгийн хуулбар;
5. Энэ жагсаалтын 1-д заасан анкетад дурдсан мэдээллийг нотлох бусад баримт бичгийн хуулбар;
6. Нэр дэвшигчид тавигдах шаардлагыг хангаж байгааг нотлох бусад баримт бичгийн хуулбар.
   

Хүсэлт гаргагч нь доор дурдсан агуулга бүхий мөрийн хөтөлбөртэй байх бөгөөд мөрийн хөтөлбөрөө битүүмжилсэн байдлаар хүсэлтдээ хавсарган ирүүлнэ. Үүнд:

• МҮОНРТ-ийг хөгжүүлэх бодлого;
• Нэвтрүүлэг, контентын бодлого, чанар, үр нөлөөг сайжруулах санал;
• Менежмент, техник, технологийн шинэчлэлийн бодлогыг боловсронгуй болгох төлөвлөгөө.