Австрали Улс орон даяар нүүрлэсэн зудын улмаас үүссэн онцгой нөхцөл байдлыг харгалзан 250 мянган австрали долларын хүмүүнлэгийн тусламж үзүүлнэ.

Австрали Улсаас манай улсад суугаа Элчин сайд хатагтай Кэйти Смит “Гуравдагч хөрш, хөгжлийн түншийн хувьд Австрали Монголтой хамтран уур амьсгалын өөрчлөлтөөс үүдэлтэй байгалийн гамшигт тэсвэртэй байдлыг бэхжүүлэхийн төлөө ажиллана. Зудад нэрвэгдсэн иргэдтэй бид сэтгэл зүрхээрээ хамт байна. Манай хоёр улс хүнд үед бие биедээ тусалж байсан түүхтэй. Монголын ард түмний өгөөмөр сэтгэлийг Австралийн  ард түмэн мартаагүй” гэжээ.

Австрали Улс хүмүүнлэгийн тусламжаа Монголын улаан загалмай нийгэмлэг (МУЗН)-ээр дамжуулан эмзэг бүлгийн малчин өрхүүдэд мөнгөн тусламж, өвс тэжээл, түлш, хүнсний дэмжлэг хэлбэрээр үзүүлэх юм.

МУЗН-ээс өрхүүдэд зудын эрсдэлийг даван туулахад  мөнгөн тусламж үзүүлэхийн зэрэгцээ Онцгой байдлын ерөнхий газар, орон нутгийн байгууллагуудын ажилд дэмжлэг үзүүлсээр байна. Хүүхэд, жирэмсэн болон хөхүүл хүүхэдтэй эхчүүдийн эрүүл мэндийг хамгаалах, цаашлаад жендерт суурилсан хүчирхийллээс урьдчилан сэргийлэх нь тусламжийн үйл ажиллагааны тэргүүлэх чиглэл байх болно.

Зудын эрсдэл өндөр, хүйтний эрч чангарч, нөхцөл байдлыг улам хурцатгаж, улсын хэмжээнд 245,005 өрх зудад нэрвэгдсэн талаар Олон улсын Улаан загалмай, Улаан хавирган сар нийгэмлэгүүдийн холбоо (IFRC) өнгөрсөн сард гаргасан тайландаа дурджээ.